Rotterdam-a ABN AMRO World Tennis Tournament first round-ah Britain NO.1 Andy Murray chuan first round chu harsa lo taka paltlangin, Frenchman Nicolas Mahut chu 6-3,6-2 a hnehin chak chungin bul a tan.

ATP Rotterdam Open round Two-ah hian World no.4 Murray hian kum 2009-a a lo hneh tawh Canadian Vasek Pospisil chu a hmachhawn dawn.

Rotterdam Open first round-ah hian Murray hi a khingpui Mahut lakah winner vawi 36 zet neiin, vawi 16 zet unforce errors a nei a, second set-ah phei chuan 5-0 a hmahruaitu a nih tumin break point tum li zet a nei tel.

Hetihlai hian Murray khingpui Mahut erawh chuan Murray hian darkar 1 leh minutes 33 chhunga a chak theih chhung hian a kaltluang tur hi tum khat chiah a tibahlah thei thung a ni. An inthlau angreng hle.

Seed 1 Murray chuan ATP Rotterdam Open-a chakna a bul a tan thei chu lawmin, “Ka practice mang lova, gym-ah pawh ka kal hek lo. mahse helai hmun hi hma taka ka thleng a, rilru fim leh helhkham nei miah lovin ka khel a, ka chak ta a ni mai” tiin a sawi.

Rotterdam results dangte:

ATP Rotterdam Open first round result dangah Spanish Garcia-Lopez chuan 7-6(7-5), 6-4 a Usbekistan mi Istomin chu hnehin round two a lut bawk a, Italian Seppi pawhin Netherland mi Haase chu 6-3,6-2 in a hneh a, seeded 4 Switzerland mi Wawrinka chuan Dutch mi Huta Galung chu 6-3,3-6,6-3 in a hneh bawk a ni.

Player thenkhatten first round an khelh laiin, thenkhat round two paltlang an awm mek a, round two result hriat theih chinah seed 2 Spanish pair inkhelah Almagro chuan 6-3,7-6(7-20 a Robreto chu hnehin round 3 a lut a, seed 4 Argentine Mayer pawhin 6-4,3-6,6-1 a Spaniard Ramos Vinolas chu a hneh bawk.