​Rossi vs Marquez

26th October 2015, 02:10PM

Nimin Sapang-a intlansiak chungchangah khan chesual ta zawk Marc Marquez chuan Rossi a chhang let ve ta.

Lap 13 turn 14-ah Rossi chuan a khup a kau a, pawn zawka awm Marquez chu a thal ta a ni. Penalty inpek danah hian point thum a awm a, Rossi hian penalty point thum hmuin intlansiak leh hmasak berah a hnung ber atangin bul a tan dawn ta a ni.

"Min rawn hnaih ta hle a, a handlebar khan ka ke a rawn tawk, ka ke a tawlhsan phah nghe nghe. Khatiang intawh mai maiah bike a tlu thei lo. A tum chu a hlen ta ngei alawm, championship chu amah vangin ka hloh dawn ta a ni," tiin Rossi chuan a sawi a nih kha.

Marc Marquez chu kha thil thleng chungchang kha zawh a ni ve a,"Kan hmu vek alawm, helicopter view atang khan a chiang em em bawk. corner 14-ah khan Valentino khan min rawn pel a, dinhmun ngaia awm tum leh mah ila khatiangah kha chuan nghah hrih mai kha a ngai, chutih laiin a ke a rawn kau a, chu chuan ka ke hma brake a rawn nawr, ka ke hma ber kawia a in brake chuan tluk kha a ni chhunzawm ta mai a ni.

"Taksa lamah chuan ka him, ka tha em em, mahse ka intlansiak ve tawhnaah inbeihna nasa tak tak ka lo hmachhawn ve tawh a, khatiang erawh ka la tawng ngai lo. A kein min tlawh hial a, podium chan tum viau mah ila ka point hlawhchhuah chu bial a ni ta a ni." tiin a sawi.

Rossi-a'n a champion-na tur dal ang zawnga a sawi chungchangah Marquez chuan,"Championship chungchangah inrawlhna ka nei lo, kei chuan intlansiak ringawt a ni ka ngaihtuah zawk," tiin a sawi a, intlawh chungchang Marquez chuan a sawi chhunzawm leh a,

"Tlankawngah chuan nasa takin kan inbei thin, kan intlanpel a, intai zauh chang pawh kan nei thin. Kha intlansiakah erawh kha chuan kha thil a thlen hma khan vawikhatmah kan intai lo. Ka la naupan vang pawh a ni thei a, helmet chhung atanga khatianga intlawh duhna rilru a rawn chhuak kha ka la tawng ngai lo a ni, min ti hnual hle nghe nghe a ni," tiin a sawi.

Phillip Island intlansiak zawha Rossi-a'n Marquez chu a champion-na tur dal tum anga a sawi chungchangah Marquez chuan,"Phillip Island-a hnehna ka chan zawha Valentino Rossi thusawi khan min barakhaih tlang hle a. Kar tluanin bike thuam thain ka buai a, Sepang-ah pawh khan Jorge, Valentino leh Dani te kha elpui ka tum. Championship-ah pathumna ni turin ka bei a, mahse min tlawhthluk takah chuan point bial ka hmu ta a ni."tiin a sawi.

Marquez-a thusawi chungchang hi Rossi chuan a chhang let ve nghal zat a,"Marquez sawi kha a dik lo a ni. Video atang khan a chiang em em, helicopter atang khan a chiang lehzual. Tih tluk ka tum a ni lo, a kawng dala tih khawtlai kha ka tum ber a ni a, Australia ai khan thil thleng tha a tha lo zawk hle mai. Hetiang game tenawm tak a ti duh hi a mak ka ti a ni. Ka ti khawtlai a, a lam hawi pahin 'hetiang hian engtin nge i tih duh ni aw...' ka ti hial.

"A handlebar khan min rawn tawk a, foot peg atang khan ka ke a tawlh sawn, ka rappial nghe nghe. Ka ke ka kau hma khan Marquez kha a tlu tan der tawh a nih kha. Moto GP bike hi pet thluk mai mai theih pawh a ni hek lo. A handlebar khan ka malpui a rawn tawk ngei alawm, kha vang khan ka rah pial phah nghe nghe zawk a ni," tiin.

Rossi chu kha thil avang khan hrem a ni a, a hremna chungchang chu fair a tih leh tih loh an zawhna chu," Kei chuan fair ka ti thei lo, Marquez chuan a tum a hlen ta a, champion lo tura min duhna chu a hlawhtling ta a ni. Tihtluk duhna thinlung ka pu ngai lo, a rilru tha lo tak thangah chuan ka awk ta a ni. Jorge nen kan inbei dawn a, a tha zawk zawk an champion ang, mahse tun ang hi chuan chutiang inbeihna chu a thleng thei dawn lo hrim hrim a ni," tiin a chhang.

pic : Veilam ami hi Rossi a ni a, dinglam ami hi Marquez-a naupan lai a ni

Rossi chuan kha thil avang khan inthiam lohna a neih loh thu leh a tih tluk ni theiin a hre lo hrim hrim bawk a. Championship inumna chu a la zawh loh thu a sawi rualin thuneitute thutlukna chuan a tihchhiat thu leh Marquez-a tum ruk a hlawhtlin thu a sawi a ni.

source : Motogp.com

Copyright © inkhel.com 2024. All rights reserved.