Piers Morgan nena an inkawmna tih chhuah a nih hnuah Manchester United chuan an forward Cristiano Ronaldo chungchang an ngaihtuah tur thu an tarlang a. November ni 22 zan khan English club chuan Portugal captain nena an inzawmna chu an chhu chat ta a ni.
Kum 2009 khan Cristiano chuan Manchester United chhuahsanin Real Madrid a pan, Spanish club-ah hian ropui takin a khel a, goal a khung hnem, club level-a hlawhchhuah theih zawng zawng a hlawhchhuak. Tin, Ballon d'Or pawh vawi 5 ngawt a dawng bawk.
Kum 2018 khan Real Madrid chhuahsanin Juventus a pan a, hetah pawh league title a la chhunzawm bawk. Kum 2021 nipui bazar inhawn lai khan Manchester City a pan dawn emaw tih laiin Sir Alex Ferguson-a'n City pan a phalsak lo, Old Trafford-ah a kir leh ta a, ropui takin Manchester United supporter-te chuan an lawm lut a nih kha.
Ronaldo hian United-ah kum hnih contract a ziak a, season khat leh a chanve hun a hman mek laiin Piers Morgan nen an inkawmnaah a club chungchang nasa taka a sawi chhuah avangin, hlawh petu United chuan an striker hi inhriatthiam tawnna hmangin an chhuahtir thu an tarlang ta a ni.
Ropui takin Old Trafford-ah a kir leh a, thla 15 chauh Manchester United tan a khel, hna nei lovin tunah chuan a awm ta a ni. Ronaldo hian club thar a nei leh ngei dawn a, khawi club nge zawm dawn tih erawh kan la hre thei lo. PSG, Bayern Munich leh Chelsea te nen sawi zawm an ni mek.
Kum 37 mi hian Manchester United tan game 346 atangin goal 145 a khung a, Old Trafford-a a kir leh hnu, thla 15 chhunga a hun tawn chhoh dan chhui let ta ila.
August 27, 2021 : Manchester United chuan an fachuam Cristiano Ronaldo chu an player a nih thu an puang a, he thu thar hian United supporter-te a ti lawm kher mai, kar khat chhung lekin United hian Ronaldo jersey chu £187million ($221m) man lai an hralh hem mai.
September 11, 2021 : Newcastle United an mikhual tumin Ronaldo a inlan ta, goal hnih a khung a, Old Trafford-ah chuan, "Viva Ronaldo," tiin mipui an au rual dual dual.
October 20, 2021 : Champions League match-ah Atalanta-in 2-0 in hma an hruai, Portugal captain chuan chakna goal khungin 3-2 in an lehthal.
October 24, 2021 : Atalanta an hneh hnu ni 4-ah Liverpool an mikhual, hetah hian mikhual team-in 5-0 laiin hnehna an chang, Ronaldo pawh a khel tluan, mahse tih theih a nei lo.
November 2, 2021 : Champions League match-ah Atalanta an tlawh, an tlawm dawn emaw tih hnuah Ronaldo chuan point khat a hlawhchhuahpui, heta tang hian Ronaldo tel leh tel loh chungchangah inhnialna a awm chho tan.
November 29, 2021 : Manchester United chuan Ole Gunnar Solskjaer an ban hnuah Ralf Rangnick chu interim manager atan an ruai tan.
March 15, 2022 : Champions League last 16-ah Atletico Madrid chuan Manchester United an hneh a, vawi hnih inkhelhah Ronaldo hian goal a khung thei lo ve ve.
April 18, 2022 : Ronaldo chuan an naute a boral thu a puang a, hemi kar tawpah hian Arsenal hmachhawn lehin goal a khung, United tan Premier League goal 100-na a khung a ni.
May 7, 2022 : Brighton chuan 4-0 laiin an sawp, hemi tum hian Ronaldo hi a nui lai camera-a lak a ni a, hei hian sawi zui a hlawh hle. United chuan point 58 hlawhchhuakin league-ah 6-na an ni a, 1989-90 season hnua season an khar chhiat ber tum an tawng.
May 30, 2022 : Ronaldo chuan United training ground-a hmanruate a that tawk loh thu a sawi niin media te chuan an tarlang.
July 7, 2022 : United-in pre-season tour an nei, Thailand an pan dawn, hetah hian chhungkaw harsatna avangin Ronaldo a tel ve thei lo. Heta tang hian club chhuahsan a duh niin report a awm chhunzawm nghal bawk.
August 7, 2022 : Nipui bazar inhawn laiin Old Trafford a chhuahsan lo, season opening match-a Brighton an hneh loh tumin bench atangin Ten Hag chuan Ronaldo a luhtir.
September 8, 2022 : Europa League-ah si khat faiin Real Sociedad an hneh lo, Ronaldo chuan game 8 lai a zawnin goal a khung ta lo, Janury 2009 hnua goal khung lova a khelh rei ber hun a tawng.
October 19, 2022 : Tottenham an hneh tumin Erik ten Hag chuan hun tawp dawnah bench atanga lut turin a ti a, Ronaldo hian a hnial, hemi hnu hian club-in a hrem chhunzawm.
November 13, 2022 : Piers Morgan chuan Ronaldo nena an inkawmna chungchang a tarlang tan a, United-in an phatsan nia a ngaih thu te Ronaldo hian a sawi bakah, an manager Ten Hag chu a zah bik loh thu te bakah club neitute chuan football an ngaihsak loh thu te thlengin a sawi chhuak.
Ronaldo hi Portugal team-ah telin an match hmasa ber atan an inpuahchah mek a, Portugal camp-a a awm laiin Manchester United chuan an inzawmna an chhutchah thu a tarlang ta a ni.