26 May 2015 06:42

digimalt

​Ropui taka Premier League inpet kai Norwich

Automatic qualification an chan ve loh avangin a harsa zawngin playoff an khel a, Playoff final-ah Norwich chuan 2-0 in Middlesbrough an hneh a, Premier League-ah ropui takin cup nen an inpet kai ta a ni.

Championship Division atangin Bournemouth, Watford leh Norwich te chuan season tharah Premier League an khel dawn ta. Norwich hian £120m chuang hlawh theihna Premier League inpet kai turin playoff semi final-ah Ipswich town an hneh a, Wembley Stadium-a mipui 85,000 chuang pungkhawm hmaah Playoff final Boro nen an khel. Hetah hian Norwich hian Jerome leh Redmond te goal hmangin si hnih faiin hnehna an chang ta a ni.

Norwich goal hnihte hi first half minute 15 chhungin a lut ve ve hman a, 12th mins-ah Jerome chuan mual veilam sir atangin ball a lalut a, defender a tih tluk avangin Boro defender te hian foul tura ngaiin an ding deuh thup, mahse referee in a ham tak si loh avangin Jerome chuan a khalh tlang ta a ni. He goal a luh atanga minute 3 lekah Redmond chuan dinglam sir atangin mawi zetin a pet goal chhunzawm a.

Middlesbrough hian theih tawpin goal khung tumin nawr leh mahse Norwich an khel tha a, a hlauhawm an thlentir tak tak hmain Boro hmatawngte hi an lo dang chat zel a, hun tawp thlengin Norwich hian goal an chhuah ta lova. Kum khat chiah Championship division-ah hun an hman hnuin Premier League-ah an inhlangkai leh ta a ni.