May ni 11, 2015 tlai dar 5 khan Mizoram atanga I-League inpet kai hmasa ber club Aizawl FC chuan Aizawl thlengin, I-League 2nd division-a an champion leh I-League an luh lawmna AR Lammualah neih a ni.

Mizoram Football Association chuan Aizawl FC I-League tlin lawmna hun hi AR Lammualah a buatsaih a. Mipui thahnem takin an lo hmuak. He lawmna hunah hian Zaithiam leh zaipawl zai ngaihthlak a ni a. Mizoram Football Association Hony Secretary Lalnghinglova Hmar chuan I-League club Mizoramin a nei ta chu lawmawm a tih thu leh Aizawl FC a chhuan thu a sawi.

Mizoram Home Minister R Lalzirliana pawhin fuihna leh lawmpuina thu a sawi a. Aizawl FC President Robert Romawia Royte chuan a hnam team ang zawnga I-League inpet kai hmasa ber an nih thu leh Football hi chanchintha puandarh nan a tangkai dawn thu a sawi a. Tin, Pathianni zana inkhel lo tura ruahmanna neih a nih dawn thu a sawi tel bawk.