Joe Cole, Rio Ferdinand leh Ally McCoist te chuan kum 39 mi Cristiano Ronaldo chungchang an sawi ho a, Joe Cole chuan Ronaldo hi a fak hle, kum 10 dang pawh a la inkhelh theih a ring hial.

Nilaini zan khan Portugal chuan 3-0 in Republic of Ireland an hneh a, Felix chuan goal khat khungin, Ronaldo chuan goal hnih a khung.

Kum 2004 khan a vawi khat nan Ronaldo chu Euro-ah a inlan, kumin hian kum 39 mi niin Euro a khel leh dawn. Ronaldo hian a vawi hnih nan Euro chawi tumin theihtawp a chhuah dawn a, Euro-a inlan hnem ber a ni dawn bawk a ni.

Podcast-ah Ronaldo chungchang an sawi ho a, Portugal hi Ronaldo tel loin an tha zawk em? Tih zawhna chu Joe Cole chuan, "World Cup-ah kha chuan Ronaldo a tel lohin Portugal kha chu an tha zawk chiang ani.

"Chutih laiin vei lamah Rafael Leao awm se, dinglamah Bernardo Silva awm se, Ronaldo hi a laiah awm bawk se, kum 10 dang pawh tha takin a la khel thei chiang ang.

"Goal khung thei a ni a, goal khung tura an siam sak chuan, Ronaldo a tel hian Portugal team hi an tha zawkin ka hria," tiin a sawi.

Ferdinand pawhin Ronaldo a telin Portugal team an tha zawk niin a ngai. Ferdinand leh Ronaldo te hi Manchester United-ah kum 6 chhung an khel dun.

"Euro qualifiers Game 9 atangin Ronaldo hian goal 10 a khung. World Cup chauh kan thlir kha chuan, Ronaldo tel loin Portugal team an tha zawk tih kei pawhin ka pawm.

"Mahse Euro qualifying hi han thlir ta ila, ani tel lo chuan Portugal hi an qualify hauh lo ang le," tiin Rio Ferdinand chuan a sawi ve bawk.

Hetih lai hian Scotland striker hlui McCoist chuan Ronaldo a dah sang tawh lo, bench lama a awmin Portugal team an that zawk thu a sawi thung.

"Khawvela player tha ber pakhat a ni, mahse World Cup ka en kha chuan a khelh lohin Portugal team an tha zawk tlat.

"Roberto Martinez khan team-ah a la lut leh kha a ni a, heti chung hian tha a thawh hlawk em em pawhin ka hre lem lo.

"Qatar World Cup atanga ka teh kha chuan, bench-ah Ronaldo awm se, Portugal team an tha zawk niin ka hria," tiin McCoist chuan a sawi.