Karim Benzema chuan Real Madrid atanga Cristiano Ronaldo a chhuah hnuah pangngai taka a inkhelh theih tawh thu a sawi.

2009 khan Karim Benzema hian Real Madrid a luhchilh a, Cristiano Ronaldo pawhin Manchester United chhuahsanin Santiago Bernabeu hi a pan ve chiah bawk a. Real Madrid-a zawm atangin Cristiano Ronaldo chu mi mit fukna ber a ni chho ngar ngar a, Juventus a zawm thlengin chutiang dinhmunah chuan a ding ta reng a ni.

Benzema hi Lyon ah a che tha thei em em a, an striker chhuanvawr ber niin, Real Madrid lam a pan hnuah chuan Ronaldo thachhang dawltu angin a awm deuh ber thung a. Tun thlengin Real tan hian game 301 khel tawhin goal 138 chu a thun tawh a ni.

Cristiano Ronaldo chhuah hnuah Santiago Solari hnuaiah Benzema chu tlar hmaah a ding hnem ta deuh a, a chungah mawhphurhna a innghat hnem ta a, hei hi Benzema hian nuam pawh a ti chho hle.

“A hma kha chuan mi pakhat, season khata goal 50 chuang thun thei a awm thin a, kei kha chu ball pass tu ang chauh ka ni mai a. Ka jersey hnungah chuan No. 9 inziak ve mahse goal thun khawl anga chhawr ka ni ngai lo hle. Ka position ni mahse centre-forward angin ka khel ngai lo a, ka khelh ber chu Cristiano kha a ni tlangpui a. Kan inkawp tha hle a, ka tum ber chu goal a thun theihna atana tha tak taka ball pek kha a ni,” tiin Benzema chuan a sawi.

“Tunah chuan Ronaldo a awm tawh lo a, goal thun hi ka duh a ni tih ka lantir a ngai a, team kaihruaitu tha tak ka nih zia ka lantir a ngai bawk a. Goal ka thun thei a ni tih hi mi ka hriattir a ngai a, ka mawhphurhna a sang ta hle a, hei hi nuam pawh ka ti hle a. Lyon-a ka dinhmun angah khan ka ding leh thei dawn tan a ni ber a, Madrid ah chuan khatiang hun lai aia tha zawkin chet ka duh a ni,” a ti bawk.

A sawi zelnaah, “Madrid ka pan tirh khan ka khelh dan thlak danglam ka duh hle a. Ka sawi tawh angin goal 50 thun tling thei tan khelmualah hun ka hmang a, khelhpui pawh a nuam hle a. Tunah chuan tlar lama hmahruaitu ber ka ni tawh a, ka kutah engkim a innghat a ni ta ber a. Football dik tak ka khelh theih tawh dawn avangin ka lawm a ni,” a ti.

Ronaldo chu UEFA Champions League goal thun hnem ber a la ni a, Karim Benzema chuan tun season chhungin goal 4 a thun tawh a, a pumpuiah goal 60 a thun tling ve tawh a ,ranking-ah hian palinaah a awm thei a, Real Madrid legend dang Raul chu goal 11 in a la pha lo a ni.