Manchester United forward hlui Cristiano Ronaldo chuan Everton fan pakhat phone a ben thlaksak avangin match hnih chhung inkhel lo tura hrem a ni. Mahse, tuna World Cup khelh lai mek hi chu a huam lo vang.

Kumin April thla khan United chuan Goodison Park-ah Everton an hneh lo a nih kha, hemi match zawha inthlakna room an panna lamah hian Ronaldo chuan Everton fan pakhatin phone a thla a lo laksak lai chu a ben thlaksak a ni.

Ronaldo hi match hnih chhung inkhel thei lo tura tih a nih mai bakah pound 50,000 chawi tura tih a ni bawk. Nimahsela, he a hremna hian Qatar World Cup ah erawh chuan nghawng a nei dawn lo thung.

Portugal hian zanin dar 9:30 ah hian Group H a an match hmasa ber chu Ghana nen an khel dawn a, hetah hian kum 37 a upa Ronaldo hi Portugal captain tur a ni.

Ronaldo hremna tawh tur hian a club thar tana a match a nghawng anga, a league khelhna tur hi England a ni emaw ni lo emaw, league match hmasa pahnih chu a chawlh ngei ngei a ngai dawn. Mahse, hetah hian Europe-a club inelna sang ho Champions League te pawh hi a huam tel dawn lo.

Ronaldo hi August thla khan Police te chuan fimkhur tura hrilhin fan naupang pakhat hnenah hian a phone a ben thlaksak avang hian ngaihdam a dil tawh a. FA lam pawhin a thiltih hi a mawi lo tih Ronaldo pawhin a pawm a, pawi a tih thu an sawi ve bawk a ni.