14 Mar 2019 03:02

inkhel

​Ronaldo nen min khaikhin suh u – Bernardo Silva

Manchester City tana contract pawtsei hlim Bernardo Silva chu tun hnaiah a khel rimin a khel tha thin hle a, City manager Pep Gaurdiola pawhin a fak fo.

Guardiola chuan Bernardo hi Portugal-ah a lar ber tawh thu hial a lo sawi tawha, hemi a nih avang hian chanchinbu mite chuan Bernardo hi Portugal captain Cristiano Ronaldo nen an khaikhin zui. Mahse Bernardo chuan Juventus player Ronaldo nena khaikhin chi a nih loh thu sawiin, chanchinbu mite chuan Guardiola thusawi chu an lakawi mai niin a ngai.

Barnardo chuan, “Guardiola thusawi kha in ngai kawi deuh mai niin ka hria.Tun kum 15 vel kalta chhunga football huang chhunga Cristiano thil tih te chu kan hre veka, football chanchina player tha ber pakhat a ni a, chuvang chuan khaikhin chi kan ni lo,” a ti.

Manchester City leh Juventus-te hian Champions League quarter final an lut ve ve a, inhmachhawn thei dinhmunah an ding mek. Round of 16-a Ronaldo chet that zia kan hria a, Atletico Madrid lakah hattrick a a siam a nih kha. Bernardo hian Portugal-ah Ronaldo a khelhpui avangin player pahnihte hi an hre chiang thawkhat tura ngaih an ni a, quarter final-a Ronaldo-a team hmachhawn mai chu a chak vak lo niin Bernardo hian a sawi.

Bernardo chuan, “Zep loh chuan quarter final-a Cristiano awmna team hmachhawn hi ka chak em em lova, amah hi ka hria a, a tih theih pawh ka hria. Chu chu Atletico lakah a lantir leh tawh bawk. Champions League anga kan khelh chuan team tha tak tak kan hmachhawn thei tih kan hria a, player tha tak tak kan tum dawn tih pawh kan hria a, chu chu a tha hle. Khawvela inelna tha berah kan khel tih a tilanga, kan tum tur kan la hre lo na in, Cristiano awmna team hmachhawn hi thil namai a ni dawn lo a ni,” a ti.