La Liga President Javier Tebas chuan an player neih that Ronaldo leh Messi te chuan English Premier League an pan mai a rin thu a sawi chhuak. Sum tamna Premier League club te hian khawvela player tha ber ber an lalut thei dawn ta tlat mai.
Hei hi a chhan ber pawh Sky Sports leh BT Sports te chuan 2016-17 season atangin kum thum chhung atan Premier League TV Rights £5.136bn in an lei hem mai a. Tuna an inremna chu £3b a nih laiin heng TV Company pahnihte hian 70% laiin TV Rights an leina man hi an pun a ni.
Tebas chuan,"Real Madrid leh Barcelona te chuan an superstar te an chan thei dawn tlat mai. Tunah hian La Liga chuan harsatna kan tawk chho mek, khawvela league tha ber kan ni tawh dawn lo. Marketing lamah nasa takin kan tlahniam dawn, hei hi a chhan chu Premier League-in khawvel hmuh theih tura TV lama nasa taka hma an lak vang a ni," tiin a sawi.
English Premier League-ah hian TV -a live-na man hi Club ten an sum hmuhna tha tak pakhat a ni a, club 20 te chuan season khat chhunga TV rights atanga an sum hmuh hi a inzat mawi tawkin an insem hlawm. Champion team leh a mawngphah team te dawn zat pawh a intluk thuak a ni.
Hetih lai hian La Liga-ah erawh Real Madrid leh Barcelona te chuan TV Rights hi an control a, team tha ber pahnih an nih avangin a tam ber an chang dun a, 2012-13 season khan Real Madrid leh Barcelona te chuan TV revenue atangin £110m lai an lalut, hetih lai hian Atletico Madrid leh Valencia te chuan £33m an lalut a, Real Betis leh club dang 5 te chuan £9.5m an chang bawk a. League hausakna zawng zawng Real Madrid leh Barcelona ten an ei vek avangin La Liga a ropui thei tak tak lo.
Hetia Real Madrid leh Barcelona ten TV Rights atanga sum tam tak an lak bik avang hian club dang an lungawi lo thin hle a, sem sem dam dam ti English Premier League an len thur thur laiin La Liga erawh an hniam rawih rawih dawn niin a lang ta. Espanyol president Joan Collet pawhin Spanish top flight club te chu an sawrkarin dan thar a siam a nih loh chuan nawrh an inrin reng thu a sawi bawk.
English Premier League hetianga suma vurna thar an dawn leh dawn takah hi chuan Club pawhin nasa takin a than phah dawn chiang a, TV atanga sum tam tak Club-in a lalut a nih chuan Ticket man hian tlak hniam lam a pan phah ngei a rinawm. Sky Sports leh BT Sports ten TV Rights an leina thar turah hian Season khat chhungin match 168 games lai LIVE in an pe chhuak thei dawn a. Match khat LIVE broadcast man hi £10.2m zel a ni dawn a ni.