Ronaldo khan Kathryn a pawngsual niin a lang

02nd December 2018, 01:12AM

Cristiano Ronaldo laka thubuai thehluh chungchang kal zelah nizan khan lehkha pawimawh thenkhat an hmuh ruka a lan dan chuan Ronaldo lawyer te chuan thil nih dan chu thlak danglam an tum niin a lang a. Ronaldo khan Kathryn kha a pawngsual tak tak niin a ngaih theih.

Juventus star Cristiano Ronaldo chu hmeichhe pakhatin a pawngsual niin a puh a, hemi thubuai an chhuina kal zelah lehkha pawimawh thenkhat chu mi thenkhatin an lo hmu fuh a. Heng lehkhaah hian Cristiano Ronaldo lawyer te chuan thil awm dan dik tak ni lo deuha thlak danglam an tum niin a lang a ni.

Kum 34-a upa Kathryn Mayorga chuan Las Vegas khawpuiah Portuguese superstar hian a pawngsual niin a sawi a, thubuai pawh an thehlut tawh nghe nghe a. Thuneitute chuan thil awm dan an chhui chiang mek a, hemi kal zela Ronaldo zawhna chhanna chu lo hmutu an awm a, a lawyer te sawi chhuah dan nen a inpersan viau niin an sawi.

June 2009 a thil thleng chungchanga zawhna hi Cristiano Ronaldo chuan ziakin a chhang a, heta a lan dan hian a hmeichhiain duhtawk tawh tura a tih thu leh, a duh loh thu a sawi thu te pawh Ronaldo chuan a ziak lang chiang a ni.

He lehkha hi September 2009 khan hmuh theihin a awm niin German chanchinbu Der Spiegel chuan an tarlang a. Mahse, a hnuah he zawhna chhanna ang hi a dang a rawn awm leh a, December 2009 khan chu chu hmuh theihin a awm a, chutah thung chuan Ronaldo chhanna chu a danglam leh vek tawh niin an tarlang.

Lehkha hmasa zawkah Ronaldo chuan a hmeichhe duh lo chung mipat hmeichhiatna a hmanpui lui niin a chhang a, mahse lehkha awm tharah chuan an pahniha remtihna thlapa mipat hmeichhiatna hmang dun angin a inziak leh daih a ni.

Der Spiegel chuan lehkha hmasa zawk chu siam danglam a nih an rin loh thu sawiin, a hnuhnung zawk chu a lem a nih an rin thu an sawi a ni.

Copyright © inkhel.com 2024. All rights reserved.