Sir Alex Ferguson chuan theih tawpin Real Madrid atangin Ronaldo lak kir leh a tum. 2013 khan United chuan Ronaldo an ko kir leh teuh hle, 99% velin Ronaldo-a'n United a zawm dawn tih a chiang tawh, mahse rokhawlhna a awm ta thut a, Ronaldo chuan United a zawm ta lo a ni tih thu Man Utd defender hlui Patrice Evra chuan a sawi chhuak.
Kum 3 zen zawn Real Madrid-ah Ronaldo chuan hun a hmang tawh. United chu Van Persie-a hovin Premier League title an la zo hlim hlawl kha a ni a. Sir Alex Ferguson chuan Europe-a champion thei team din a tum leh mek, United hma lam hun tur a duang leh mek a. A player duh em em Cristiano Ronaldo chu Real Madrid atanga sawm chhuah leh a tum. Sir Alex hian a tum chu a hlen thawkhat tawh, Ronaldo chu United-ah a kir leh dawn mek. Mahse a nupui unaunu a borual ta hlauh a, Sir Alex Ferguson chuan Football a chawlhsan ta a ni.
Hetih hun lai boruak inlumleh dan chungchang Evra chuan a sawi chhuak leh a. "A chawlh puan atanga kar hnih hmalam kha a ni. Team dinthar leh chungchang kan sawi a, a naupang tha leh emaw tih mai turin a la phur em em a. Ronaldo chuan United a zawm leh dawn a ni tih min hrilh nghe nghe.
"Team thar din tura min sawm tuma kha thu min hrilh kha chuan ka hlim tak zet a ni. Kei chuan, a va lawmawm ve pu duh tak, team thar chu din leh ila ka ti nghe nghe. Champions League lam ka ngaihtuahnaah a awm nghal vat a.
"Mahse khang thil a thlen takah kha chuan ka beisei zawng zawng a thamral ta. Hrehawm ka ti tak zet a, engkim mai hi a chhe ta vek a ni ber mai," tiin Evra chuan The Sun Times a hrilh.
Sir Alex-a'n United a chhuahsan hnu thla 12-ah Evra chuan Serie A a pan ta a, Old Trafford-a team ropui tak Ronaldo hova din an tum lehna chu a thamral ta a ni.
pictures credit : Getty & Alex Livesey