Ronaldo hnung zui tur Gareth Bale

30th November 2018, 02:11AM

Gareth Bale chuan Real Madrid-a a khelhpui thin Cristiano Ronaldo hnung a zui ve thei tih thu a agent chuan sawiin, Spain chhuahsanin Serie A lama kal hun a thlen ve theih thu a sawi.

Bale-a agent Jonathan Barnett chuan tun dinhmunah Wales star chu Real Madrid-ah a la hlim viau nia sawiin, thil eng pawh thleng thei a nih avangin nakin zelah chuan Serie A lamah a la kal ve thei niin a sawi a. A hun tur erawh sawi theih a la nih loh thu a sawi tel a ni.

Kum 29-a upa Gareth Bale hian Spain a chhuahsan dawn hnai nia sawi a awm leh thin a, hetiang thawm a rik takah chuan Manchester United leh Bayern Munich te chuan an beng an lo chhi ngun hle mai a. Mahse, tunah chuan La Liga leh Champions League title la thei turin Real Madrid chu theihtawp a chhuahpui mek a ni.

Cristiano Ronaldo a chhuah tak avangin Bale hian Portuguese star hmun ruak chu luah thei turin tan a la hle a, Santiago Bernabeu ah Ronaldo anga boruak lian neih theih tumin theihtawp a chhuah chho mek a, chhuah lampang pawh a la ngaihtuah hman meuh rih lo a ni.

Jonathan Barnett chuan, “Gareth hi Real Madrid-ah a la hlim viau a, mahse nakin zelah chuan eng thil pawh a thleng thei a, chhuak ve thut thei chu a ni tho mai,” tiin a sawi.

A sawi zelnaah chuan, “Cristiano Ronaldo kha Real Madrid tan a hlu a, a khelhna a sawn ta hi Real tan chuan a pawi tham em em a. Gareth hian Cristiano nena khelh dun kha nuam a ti thei hle a, a chhuak ta pawh hi a ui ve khawp mai,” a ti bawk.

Barnett chuan Bale chu chona thar hmachhawn zel thei a nih thu sawiin, hun lo la awm zel turah Bernabeu chhuahsanin hmun dang pan te pawh a la rilruk ve theih thu a sawi a. Hmun dang pan a rilruk a nih chuan khelhpui nuam a tih thin em em Cristiano Ronaldo hnung zuiin Serie A lam a pan a rinawm ber niin a sawi bawk a ni.

Copyright © inkhel.com 2024. All rights reserved.