Cristiano Ronaldo chuan tun hnai kum thum chhungin tu mah a la bum tlang lo niin Fabio Capello chuan a sawi.

Tun hnaia an game hnuhnung pahnihah Cristiano Ronaldo chu an khelh tluantir lo a, an la thlak ve ve a. Pathianniah khan Juventus leh AC Milan te an inkhel a, hetah hian minute 55-naah boruak danglam tak siam lem lo Cristiano Ronaldo chu Paulo Dybala chuan a thlak a, minute 77-ah an chakna goal a thun zui a ni.

An thlak hnuah hian Cristiano Ronaldo chu a lawm lo hle a, inkhelh zawh hmain lungawi lo deuhin football stadium chu a chhuahsan zui daih a ni.

Hetianga Ronaldo chet dan hi Juventus player leh manager hlui Fabio Capello chuan a ngaihtheih loh thu sawiin, player puitling awm dan tur a nih loh thu a sawi a. Khelmuala a thatna thlengin Capello chuan a sawisel zui a ni.

Fabio Capello chuan, “Cristiano Ronaldo awm dan kha tha ka ti lo a, ka duh loh zawng tak a ni. Ka ngaihtheih chi a ni lo hrim hrim. Khelmual a chhuahsan a nih pawhin player ropui tak a nihna kha a lang tel zel tur a ni,” a ti.

“A nihna takah chuan kum thum chhung chu Cristiano Ronaldo hian tu mah a bum tlang thei tawh lo a. La Liga lama mi a bum nasat thin lai khan commentator te ka lo ni ve tawh thin a, tunah chuan khatiang kha hmuh tur a awm tawh rih lo a ni,” a ti bawk.

A sawi zelnaah, “Amahah hian super-champion a awm a, a tha ber pawh a ni a. Tunah erawh chuan Dybala leh Douglas Costa te an awm a, anni hian goal pawh an thun thei hle a. Dybala hi a che tha chho hle a, team tan chanchin danglam a thlentir thei a, chutiang bawkin Douglas Costa pawhin a ti thei a ni,” a ti.

“Ronaldo tel lo hian Juventus chu an chak thei a. Amahah hian Juve hi an innghat nasa hle niin a ngaih theih a, a tel lo pawh hian squad ropui tak leh player tha tak takte hi an chak thei chiang a. Sarri khan Ronaldo kha a la chhuak ngam a, a fakawm hle a ni,” tiin Capello chuan a sawi.