Cristiano Ronaldo chungchangah Portugal-a a team-mate leh Manchester United tana a khelhpui ṭhin Bruno Fernandes a ṭawngchhuak ve ta.
Portugal midfielder Fernandes chuan Ronaldo nena Manchester United tana khelhdun chu a duhthusam a nih thu leh engmah hi kumkhaw daih a awm loh thu a sawi.
Manchester United chuan inremna neihpuiin Ronaldo contract chu an titawp tawh a ni.
Portugal hian ningani hian World Cup-a an inlanna hmasa ber ni turin Ghana an hmachhawn dawn a, Fernandes chuan Ronaldo chungchang thil avangin players te an buai loh thu a sawi tel bawk.
“Hemi chungchang thu hi kan sawi ngai lo, World Cup-ah ram tana kan khelhna tur atan kan team-ah chauh rilru kan seng,” tiin an midfielder Fernandes chuan a sawi.
United in kum 37 a upa Ronaldo contract an tihtawp chhan, a interview-naa a khelhna club a sawichhiat avang leh an manager Erik te Hag pawh a zah loh thu a sawi avang hian inhnialna leh chanchinthar tam tak a hring chhuak a. Hetiang hi ni mah se United a team-mate ṭhin Fernandes chuan Portugal national team chuan an buaipui ve loh thu a sawi.
Kum 28 a upa Fernandes chuan ti hian sawi chhunzawmin, “Cristiano tan leh midang zawng zawng tan pawh hian Portugal tana khelh hi a pawimawhzia kan hre ṭheuh ang, kan duhthusam pawh a ni. National team tan hian kan rilru zaah za kan seng, chuvang chuan kan tihtur leh tih loh tur chu kan hria a ni.”
“Rilru nuam loin ka awm lo a, Cristiano nena khelhdun hi ka ngaihlu. Engtiklai pawhin phurna min petu a ni a, Man Utd. tana khelhdun hi ka duhthusam ni mah se engmah hian kumkhua a daih lo a nih hi.”
“Kan khelhdun ṭhin lai pawh khan nuam ka ti, mah se tunah chuan a duhthlanna hi kan zahsak a ngai, keini lo remtih a remtih loh theih ngawt a ni lo.”
“Atan pawh duhthlanna siam thiam a harsa ang, mah se hei hi kan zavai atan kan ṭhattlanna tur zawk a ni ang,” tiin a team-mate thlavang a hauh.
Portugal boss Fernando Santos chuan Bruno thusawi a hriatin heti hian a sawi ve, “Hemi chungchang (Ronaldo-a’n United a chhuahsan) thu hi kan la sawi ho ngai lo hrim hrim a, ngaihdan pawh kan nei lo. Players te chuan an duh duh tih theihna hun an nei teh meuh mai, mahse, ngaihtuah tur an hria a, he inelnaa kan chak theih nan chiah hian an rilru an seng.”
“Tun hnai maiah pawh mak tih deuh deuh tur thilthleng a awm nual, kan chungah pawh thleng ve thei reng a nih avangin kan hun pawimawhah hian thil dang ngaihtuah nan hun kan nei lo a ni,” tiin.
Portugal-in World Cup-a an hmachhawn hmasak ber tur Ghana te hi kumin kumtira African Cup of Nations-ah khan group stage-ah a hnuai berah awmin tla nghal mah se World Cup Qualifying-ah an elpui lian ber Nigeria chu hnehin World Cup an khel thei a ni.
Ghana coach Otto Addo pawhin an hmachhawn tur Portugal-a Ronaldo chungchangah hian buaina an neih loh thu leh tupawhin chak an duh vek thu a sawi.
Addo chuan, “Hemi chungchang hi ka ngai pawimawh hran lo, kan buaina a ni lo a, buaina lian thamah vak pawh ka ngai lo.”
“World Cup boruakah kan awm tawh avangin mi tute pawhin he inelnaah hian chak kan duh vek, chuvang chuan hemi hian midang a tihbuai vak ka ring lo,” tiin a sawi ve bawk.
Ghana captain Andre Ayew pawhin Group H-a an match hmasa berah Portugal hmachhawn hi a chak tawh thu a sawi a, Ronaldo chungchangah pawh an buai loh thu a sawi ve bawk.
Ayew chuan an kawmnaah ti hian sawiin, “Kan boss-in a sawi tawh ang khan kan hmachhawn tur team player pakhat zinga thil thleng hi kan tan buaina tur a awm lo. Portugal hi team ṭha tak an ni a, World Cup khel tur pawh hian an inring tawh viau ang.”
“Portugal hi chanchinthara mite ngaihven hlawh ber pawl an ni a, mah se keini chuan chanchinthara mite ngaihven ber pawl nih hi khelmual chhungah a pawimawh ber lo tih lantir kan tum ang,” tiin chak ngei an tum thu a sawi a ni.