Supercoppa Italiana inkhelah Juventus leh AC Milan-te chu Saudi Arabia ramah inkhelin, King Abdullah Sports City-ah an inhmachhawna, Juventus hi si khat faiin an chak. Goal awmchhun khungtu hi Cristiano Ronaldo a ni.
Juventus 1-0 AC Milan
(Ronaldo 61’)
Max Allegri chuan Juve lam hi 4-3-3 formation- in a rawn rem a, Paulo Dybala chuan hmatawngah khelh tirin Douglas Costa leh Ronaldo-te a sirah an tlan. AC Milan lam pawh 4-3-3 formation tho va inremin manager Gennaro Gattuso chuan Patrick Crutrone chu hmatawngah dahin Hakan Calhanoglou leh Samu Castillejo-te chuan a sirah an thlawp bawk.
Juve hian a vawikhat nan kum 2015 hnuah he trophy an la leh a, Ronaldo an lakluh man telin, tun season-a an trophy hmasa ber an la. Juve lamin first half an thununa, Douglas Costa leh Joao Cancelo –te chuan chance tha tak tak nei mahse goal-ah an chantir thei lo. French midfielder Blaise Matuidi chuan darkar chanve vel khelh a nihin goal a khunga, mahse a offside avangin goal-a pawm a ni lo bawk. Half time hma lawkin Ronaldo hian chance tha tak a nei a, lo back-volley mahse a ni pawh hian goal-ah a chantir lo. Half time hma lawk hian Milan lamin goal an khung teuh hle a, Hakan Calhanoglou ball chhuih chu Juve keeper Wojciech Szczesny chuan a lo save.
Second half tan a nih hnu lawkah Milan player Patrick Crutrone chuan goal bar a pet per nghal. Mahse Milan an hlauhawm zui lutuk lova, darkat khat khelh a nihin Juve-in goal an khunga, mi tam takin a khawvela footballer tha bera an ngaih Ronaldo chuan Juve tan goal a khung. Midfielder Miralem Pjanic hnen atanga ball tha tak a hmuh chu Ronaldo chuan a lo tauh goal-a, Milan keeper Gianluigi Donnarumma tan tih theih a awm lo. Hemi hnu hian Pualo Dybala chuan goal-a khung emaw ti mahse offside avangin goal-a chhiar a ni lo leh. Chelsea zawm mai tura ngaih Gonzalo Higuain chu second half-ah dah luh ni a, Higuain-a luh hnu lawk hian Franck Kessie chu Emre Can laka a foul avangin hnawhchhuah a ni a, Milan tan beisei a bo tan hle. Hun tawp hnaih lamah Can chuan Andrea Conti chu box chhungah ti tlu in, Milan hian penalty hmuh ngei in beisei mahse referee chuan penalty pekna tlakah a ngai lo thunga, inkhel hi 1-0 in a tawp a ni.