Ballon d’Or vawi nga dawng tawh; tunlai footballer mai ni lova, football chanchina footballer ropui ber zinga mi Cristiano Ronaldo chuan a career-a a goal 700-na a khung.
Portugal captain hian Euro 2020 qualifiers-a Ukraine an hmachhawn tumin penalty spot atangin goal a khunga, Portugal hi 2-1 in chak lo mahse Ronaldo chuan a goal 700-na a khung.
Game 973 atangin goal 700 Ronaldo hian a khunga, heng game 973 atanga game 458-ah te hian goal khat emaw tal a khung ziah.
International football-ah Ronaldo hi khawvela goal khung hnem ber pahnihna a ni a, Portugal tan goal 95 khung tawhin, ani aia ram tana goal khung hnem hi Iranian mi Alu Daei chiah a awm tawha, Daei hian goal 109 a khung a ni.
An career chhunga goal 700 khung tling thei hi football chanchinah an tam lo hle a, Czecg-Austrian forward thin Josef Bican chu career goal ngah ber niin ani hian goal 805 lai a khunga, pahnihnaah Brazil legend Romario awmin ani hian goal 772 a khunga, pathumnaah Pele awmin, Pele hian goal 767 a khung ve bawk.
Hugarian player ropui ber Ferenc Puskas chuan a career chhungin goal 746 a khunga, German striker ropui Gerd Muller chuan goal 735 lai a khung bawk.
Ronaldo hian a career-ah Real Madrid tan goal a khung hnem bera, Los Blancos tan CR7 hian goal 450 ngawt khungin, Manchester United tan goal 118 a khung bawk a ni.