Karim Benzema chuan Cristiano Ronaldo chhuah hnuah a mawhphurhna a san belh phah tih sawiin, mi tam tak chuan a hma zawng aia goal thun nasa tura a laka beiseina an neih phah thu a sawi a, Portuguese star ai awh zo ni tura a inpeih thu a sawi.

Real Madrid striker Benzema chuan Bernabeu atanga Cristiano Ronaldo a inthiar chhuah atang khan mi chuan a lakah beiseina an neih san lehzual phah niin a sawi a. A hmaa Ronaldo lo tih thin tawh ang khan Real Madrid tana goal thun teuh teuh turin an beisei tawh tih a sawi a ni.

Cristiano Ronaldo khan kum 9 chhung zet Los Blancos tana La Liga game 275 a khelhah goal 311 ngawt mai a thun hman a, kumin July thla khan Bernabeu chhuahsanin Juventus a zawm ta daih a ni.

Inelna hrang hrangah Ronaldo kha season 9 chhung chu Real Madrid top scorer a ni chho zel a, tun season-ah chuan Karim Benzema chu Real tana goal thun hnem ber ni mekin, game 18 khelhah goal 10 chu a thun tawh a ni.

Benzema chuan, “Cristiano a awm tak lohah chuan goal thun hna chu ka mawhphurhnaah ka dah nghet ve tial tial a. A awm lai kha chuan amahah kan innghat nasa lutuk a, inthlahdah pawh a awl phah a, tunah chuan theihtawp chhuah tak meuh a ngai tawh dawn a ni,” a ti.

“A tam thei ang ber goal thun tumin tan ka la chho dawn a, ka tan chuan chona thar hmachhawn hi a phurawm hle mai a, he mawhphurhna hautak zet mai keng kawh tur hian ka inpeih a ni tih ka sawi duh a ni,” a ti bawk.

Real Madrid ah season 10 a hmang tan mek a, a laka beiseina sang tak an nei pawh a hriatthiam thu sawiin, “Heti chen hi Real tan ka lo khel ve ta a, Madrid hi khawvela club tha ber a ni a. Tu te pawhin striker atanga an beisei chu a chiang a, goal tam thei ang ber, ball khawih hnem, mi goal thun tur siamsak hnem te a ni a. Hei hi thil nih dan tur pawh a ni chiah a. Tun season hi season dang zawng aia ropui zawk nihtir hi ka duh tak zet a ni,” a ti.