Manchester United manager Erik Ten Hag chuan Cristiano Ronaldo chu a inkhelh tam loh avangin a hlim lo hle niin a sawi.
Kum 37 mi Ronaldo hi tun season Premier League-ah vawi khat chiah a la start a, Europa League lamah match hnih a start tawh, bench lamah hun a hmang hnem a. Pathianni zana Manchester Derby match-ah pawh khan bench-ah awm mah se chhawr a ni ta lo bawk a ni.
Ten Hag chuan, "Sunday-a a inkhelh ve loh avang khan a hlim lo hle a ni. Ani hi chuan inkhelh reng a duh a, a inkhelh loh hian a hlim lo thin, chu chu ama chungchanga thil chiang chu a ni.
"Player te hnenah heti hian ka sawi thin, 'He hmunah hian i hlim tur a ni, bench-a hun i hmang tam a nih chuan he club hi i khelhna tur a ni lo,' tiin.
"Ronaldo hi player thawkrim leh midang el thin a ni a, a inkhelh loh hi chuan a hlim ngai lo. Chutih laiin training a nei tha a, a rilru put hmang pawh a dik, a theihna zawng zawngin a khel thin, chu chu a hnen atanga kan beisei a ni thin reng bawk," tiin a sawi.
Manchester United captain hlui Roy Keane khan Manchester Derby-a Ronaldo khelhtir a nih loh chungchangah Erik Ten Hag a dem hle, Ronaldo-a career ropui tak hi a zah lo ang hialin Keane khan a sawi a nih kha.
Chutih laiin Dutch Coach erawhin Ronaldo zahawmna humhim a duh avangin a inkhelhtir ve loh thu a sawi thung. Ronaldo a luhtir dawn emaw tih laiin Martial a luhtir a, goal hnih a khung nghe nghe a nih kha.
Nipui bazar inhawn lai khan Old trafford chhuahsan tumin Ronaldo khan hma a la a nih kha, Erik Ten Hag-a hnuaiah season bul an han tan a, bench lamah hun a hmang hnem ta zawk tlat mai.
Ronaldo leh Chelsea sawi zawm an ni reng bawk a, media thenkhat chuan Jauary transfer window inhawn hunah Ten Hag chuan Ronaldo hi chhuahtir a phal dawn nitein thu an vawrh darh bawk.
Engpawh ni se, Erik Ten Hag hian a player tinte chu team tana tha tur berin a enkawl hlawm niin a lang a, Ronaldo pawh a thatna phochhuah sak leh ngei a tum dawn niin a lang bawk.
Europa League khel tura an inbuatsaih laiin Ten Hag chuan Manchester City an hmachhawn kha an team tan thil tha tak a nih thu a sawi nawn leh. 6-3 laiin Etihad Stadium-ah khan an tlawm kha a ni a, first half-ah phei kha chuan puiting leh naupang inkhel ang maiin team hnihte kha an inbuktawk lo deuh a ni.
Ten Hag chuan, "Manchester City kan han tum kha chu kan nihna tak kan inhriat phah a, a lawmawm khawp mai. Hmabak kan la ngah hle, Pep Guardiola leh Manchester City chungah ka lawm em em, zirtur tam tak kan hriat phah a ni.
"Kan inenlet a ngai a, kan team khelh dan tur leh kan theihna chin bituk thar kan nei dawn a ni," tiin City an hmachhawn kha an tan chuan inenfiahna pawimawh tak a nih thu a sawi chhuak.