Kar hmasa khan Cristiano Ronaldo chuan Al-Nassr a zawm dawn tih puan chian a ni a, medical te a neih hnuin thawhlehni zan khan Al-Nassr chuan official-in Ronaldo an pho chhuak.

January ni 5 zanah Al-Nassr chuan Al-Ta'i an hmachhawn dawn, hetah hian Ronaldo chu squad-ah telh a ni lo. Ruah nasa takin a sur a, hei hian Stadium electric thil velah harsatna a thlen chhunzawm.

Al-Ta'i nen an inhmachhawn hma hret hian inkhelh hun sawn hlat a ni ta a, Al-Nassr chuan, "Ruah nasa tak a sur avang leh khaw awm danin a zir loh avangin Stadium electric thil velah harsatna tawh a ni a.

"Zanina Al Ta'i nena match kan khelh tur chu darkar 24 chhung atan postponed a ni e. Fans chungah ngaihdam kan dil a, in zin veivahna kawngah him taka zin turin duhsakna kan hlan a che u," tiin twitter-ah an tarlang.

Goodison Park-a fan pakhat mobile phone a ben thlaksak thubuai kal zel chu nikum kum tawp lam khan chinfel a ni a, Ronaldo chu match hnih khel thei lo tura hrem a ni.

Manchester United chhuahsan tawh mah se he hremna hian a umzui zel dawn a. Premier League-in he hremna hi lek mah se FIFA hnuaia League an nih avangin khawi hmunah pawh FIFA hnuai league-ah chuan Ronaldo hremna hi a nung reng dawn tihna a ni.

Heng te a nih avang hian Al-Nassr tana Ronaldo inlan hun tur hi sawi chian theih a la ni lo a, an game hmasa pahnih chu a inlan thei dawn lo nia ngaih a ni.

Al Ta'i an hmachhawn hun tur hi sawi chian theih a la ni lo a, inrinniah Al Shabab an hmachhawn leh dawn, hetah pawh hian Ronaldo a la inlan thei dawn lo. Al Ta'i match hi an sawn hla viau a nih phei chuan January ni 21-a Ettifag an hmachhawn hunah pawh Ronaldo hi a la inlan thei lo maithei a ni.