Portugal chuan Euro 24-a an game hmasa berah 2-1 in Czechia an hneh a, he match-ah hian kum 39 mi Cristiano Ronaldo a khel tluan a, a khel tha pangngai hle nghe nghe, goal khung ngat phei selang chuan khel tha ber zingah a lang thei hial ang.

Czechia khan defensive game an khel a, defender 5 te an inrem thin. Wing atanga ball vawrh luh tur kha nasa takin an veng a, anmahni defensive third-ah an inhnawhkhawm nasa hle. 

Kha avang khan Portugal tan goal khung a harsat phah a, mi thenkhat chuan ball an vawrh nasa tawk lo niin an ngai a ni maithei, mahse Czechia player a sira awm te khan ball cross tur kha nasa takin an veng a, Portugal tan chance siam a harsa hle.

Khati chung khan target man Ronaldo chuan shots vawi 5 a nei a, shots on target vawi 3 neiin, chance hlauhawm vawi 2 a siam bawk. Tin pass vawi 22 neiin, pass sual a nei lo bawk.

First half-a Ronaldo shot pahnih chu Czechia goalkeeper Stanek chuan a lo dan sak ve ve. Second half-ah goal a khung teuh hle a, goal post a tauh per, mahse offside an pharsak.

Khang game angah kha chuan centre forward te tan chance tam tak neih a har thin a, Czechia an inveng tha a, an tum angin thil a kal tluang teuh hle. Counter attack kha an innghahna a ni a, goal pawh an khung hmasa zawk a, Portugal goal bul an thlen phei changin an hlauhawm thin hle.

Czechia khan an khingpui kha team tha zawk an nih zia an hrechiang, an goal an veng phawt, chance an neihah an ti goal zui bawk. Point khat tal hlawhchhuah tumin an bei. Mahse Portugal nawr na lutuk kha an veng zo lo a ni ber mai.

Group F Match pakhat zawk Turkey vs Georgia kha a hmuhnawm zawk fe, anni kha chuan goal an veng reng lem lo, open game hmuhnawm tak kan en a, an innawr tawn zak zak. Tun Euro-a game hmuhnawm ber zinga mi a ni chiang e.

Turkey chakna Arda Guler a ni kan ti thei awm e, 3-1 in Georgia an hneh a, Turkey leh Portugal te chuan point 3 ve ve an hlawhchhuak nghal a, goal khung hnem zawk Turkey chu hmahruaitu an ni mek.