​Ronaldo a chhuak dawn lo - Zidane

09th January 2016, 01:01AM

November thla khan Manchester United boss Van Gaal chuan Real Madrid star Cristiano Ronaldo chu Old Trafford-a hruai kir leh dan an ngaihtuah mek thu a sawi a nih kha.

Rafa Benitez an ban hnua Real Madrid boss thar Zinedine Zidane chuan an forward Ronaldo chu a chhuah loh tur thu leh Real Madrid innghahna a nih thu vawiin khan a sawi chhuak.

"Cristiano hi hralh palh loh player mai a ni lo. Real Madrid innghahna thlarau chu a ni. Khawiahmah a kalsawn dawn lo a ni," tiin Zidane chuan Madrid boss a nih hnua a match hmasa ber an khelh hmain a sawi chhuak a ni.

Inrinni zanah Zidane chuan Real Madrid boss a nih hnua a game hmasa ber a khel dawn a, Real hian La Liga match-ah Deportivo an tum dawn a ni.

Ronaldo hian a club hlui Manchester United lam a awn leh tawh nia media te sawi thin chu Zidane hian a nawhreh ta vek ti ila kan sawi sual lovang ? November thla khan Van Gaal chuan Ronaldo te anga player tha an melh thu a sawi a, Ronaldo ngei pawh hi an ngaihven reng thu a sawi tel bawk a nih kha.

2009 khan Ronaldo hian a hun laia footballer man to ber niin Real Madrid a zawm a. Fifa World player of the year pawh vawi thum lai a dawng ta a. Tin, Real Madrid tana goal khung hnem ber a ni thei hial. Tun season tir lamah khan Real Madrid tana goal khung hnem ber Raul-a record chu a khum a nih kha.

Tin, Champions League-ah pawh goal khung hnem ber a ni mek bawk a, Real Madrid a pan hnuin La Liga title pakhat, Champions League title pakhat leh Spanish Cup title pahnih a la tawh a ni.

source : bbc

Copyright © inkhel.com 2024. All rights reserved.