Ronaldinho nui hmel a chuai tawh

30th March 2020, 10:03PM

Ronaldinho chuan inkhelh a thiamna piah lamah a nui hmel a larpui thin hle a, Paraguay rama tan ina a tan hnuah erawh a nui hmel a chuai vek tawh niin an sawi.

Brazilian football star hlui leh a unaupa Roberto Assis te chu March 6 ah khan thuneitute chuan passport lem an neih vangin an man a, Asuncion bula tan inah an khung a ni.

Thuneitute hian coronavirus darh mek avangin tan ina tangte chu tu tlawh mah an phalsak lo a. Hetih lai hian Paraguay international forward hlui Nelson Cuevas chauh chu Ronaldinho tlawh an phalsak a, anni pahnih hi thian tha tak an ni.

Nelson Cuevas chuan, “Ronaldinho hi a hlim lo hle a, a lungngai tawh tak zet a. A nui hmel kha a larpui em em thin a, fiamthu a duh a, engthawl takin a nun a hmang thin a. Tunah erawh a nui hmel a chuai vek tawh a, lungngai hmel a pu tawh a ni,” a ti.

Paraguay national team tana vawi 41 khel thei Nelson Cuevas chuan Ronaldinho chu darkar nga atanga darkar ruk chhung vel a titipui thu sawiin, 2002 World Cup winner chu ama thil tihsual ni lo, tu emaw mi tha lo takte vangin tun dinhmunah hian a ding nia a hriat thu a sawi chhuak.

“Tuna tan ina an tan chungchangah hian Ronaldinho hian engmah a hre lo a, a unaupa chuan a hre thung a. Ronaldinho hi a fihlim a, mi dik lo takte hian an thil tih tha lo takah an telh ve ringawt a. Passport lem kawl vangin a thiamloh ni miah loah thubuai a awrh dawn phah a ni,” tiin Cuevas chuan a sawi.

March 4 ah khan Ronaldinho leh Assis te chu Paraguay ah an kal a, hetah hian naupang puala charity event neihnaa tel tur an nih bakah lehkhabu thar tilar tura beisei a ni bawk a. Anni pahnih hi hemi niah hian an lo man a, thuneitute chuan passport lem hmangin an ramah an lut niin an puh a ni.

Anni hian thil tihsual an neih loh thu sawiin, an lehkha pawimawhte chu Asuncion international airport-ah miin an pe niin an sawi a. An phatna hi thuneitute chuan an pawm rih lo a, tan inah hian an khung ta a ni.

2018 ah khan Ronaldinho hian inkhelh a chawlhsan a, a chawlh hma hian Gremio, Paris Saint-Germain, Barcelona, AC Milan leh Atletico Mineiro velah te leh club dangah te pawh a khel kual hman a ni.

Copyright © inkhel.com 2024. All rights reserved.