Ronaldinho chu thla li vel zet house arrest-a an awmtir hnuah an chhuahtir ve tawh dawn a, a chungthu erawh an la ngaihtuah tho ang.

Brazil World Cup winner Ronaldinho hi Paraguay ramah a unaupa Roberto de Assis Moreira nen an kal a, passport lem an hman avangin March 5 ah khan an man a, thuneitute chuan an tantir nghal a ni.

An unau hian tan inah an khung zet a, £1.2 million bail an pek hnuah chuan Paraguay khawpui Asuncion ah house arrest in an awmtir zui a. Thuneitu lampang chuan Ronaldinho te chungchang hi a hmawr an bawk thei dawn hnai tawh niin an sawi a, finfiahna thar engmah an neih belh tawh lo niin an sawi.

Paraguay rama thuneitute chuan hma lak zel dan tur an ngaihtuah mek a, he mi chhung hian Ronaldinho te unau chu chhuahtir an remti tawh niin an sawi a. An unau hian dik lo taka pawisa khawih thin niin an sawi zui a, hemi chungchang hi an chhui zui mek niin an sawi bawk.

An kut atang hian Paraguay ram passport lem an mansak a, bail an pek hnuah Asuncion khuaa Sheraton hotel ah an tantir zui a. Paraguay rama an luh tirh hian an unauin passport lem hi hman an tum niin thuneitute hian an puh a ni.

Passport lem nia an sawi hi Ronaldinho hminga awm niin, a pianna te, a pian ni vel te chu a dik vek a, chutih rualin Paraguay ram mi angin a inziak thung a, hei hi an man chhan ber pawh niin an sawi a ni.

Barcelona star hlui Ronaldinho hi Paraguay ramah hian charity pakhat ‘La Fundacion Angelical’ an tih avanga kal niin an sawi a, tlema khawsak harsa zual deuh naupangte tana damdawi ngaihtuahsak tura hma lak tum niin an sawi a ni.