England goalkeeper hlui David James chuan Manchester United goalkeeper Sergio Romero chu keeper theuneu lo tak a nih thu sawiin, Manchester City goalkeeper Ederson leh Liverpool goalkeeper Alisson-te ang tho a ball sem thiam a nih thu a sawi.

Manchester United chuan tun Sunday lo awm tur hian Premier League game pawimawh tak an khel dawna, Old Trafford-ah an hmelma lian ber Liverpool lo mikhual dawnin, he inkhelah hian an goalkeeper David De Gea an chhawr thei lo maithei.

United hian Spanish keeper De Gea hi an chhawr thei lo a nih chuan Argentine keeper Romero hi an chhawr a ngai dawn a, tun season-ah Romero hian Carabao Cup leh Europa League-te khel tawh mahse Premier League-ah a la inlan lo.

David James chuan Romero chungchang sawiin, “A khel hi ka zir chiang tawh a, keeper tam tak chu ball an sem chhuah hian mumal lo takin, mi tamna laiah ball an pe mai zela, mahse Romero hi chuan a ke veilam leh ke dinglam hi Alisson leh Ederson-te ang tho in a hmang thiam.

“De Gea hi first choice a ni chianga mahse Manchester United-in Romero an lei khan a inkhel kha ka en chik em em a, a ke a hman thiam em avang khan mak pawh ka ti hiala, De Gea pawh khan a game-ah hma a sawn zui bawk.

“Nitin maia goalkeeper pahnihin training an neih dun ziah chuan, player pakhat zawk atang khan thil tha tam tak an inzir tawn thin a ni,” a ti.