26 May 2015 07:14

digimalt

​Rome derby-ah Roma chungnung

Thawhtan zan khan Rome derby hmuhnawm tak khelh a ni a, mikhual AS Roma chuan mual neitu Lazio chu 2-1 a hnehin, Roma hi 2014-15 Serie A-ah khelh khat la awm mahse pahnihna an ni chiang tawh a, season tharah Champions League an khel dawn chiang ta a ni.

Goal lutte hi second half a lut an ni a, Juan Iturbe chuan 73rd mins-ah Roma hma a hruaipui a, he goal hi 81st mins-ah Lazio tan Filip Djordjevic chuan a lu hmangin a rul. Hun tawp dawn minute 5 la awmin kum 26 mi, Newcastle defender hlui Yanga-Mbiwa chuan Miralem Pjanic free kick chu tauh goal-in, chakna goal a khung a, 2-1 in Roma chuan hnehna an chang ta a ni.

Lazio 1-2 Roma

(Djordjevic 81′) (Iturbe 73′ Yanga-Mbiwa 85′)

Serie A hian Champions League team 3 a thawh thei a, Champion leh pahnihna te chuan Group stage atangin an khel tan nghal thei a, pathumna erawh chuan qualifying an khelh phawt a ngai dawn a ni. Roma chuan Champions League an khel dawn chiang ta a, Lazio erawh Champions League qualifying khel turin Serie A match hnuhnung berah point khat chiah an mamawh a ni.

Palina Napoli hian point 3 in pathumna Lazio hi an phak lo mek, Serie A match hnuhnung ber May ni 31-ah khelh a ni dawn. Hetah hian Lazio leh Napoli te an inhmachhawn dawn. A chak zawk zawkin Champions League qualifying an khel ang. An inhnehtawk a nih chuan Lazio hian Champions League qualifying an khel anga, Napoli an chak zawk a nih chuan pathumna niin Champions League qualifying an khel dawn.

Napoli hi an chak zawk a nih chuan 66 points ve ve an nei anga, goal difference-ah Lazio chungnung zawk mahse Italy-ah chuan head-to-head an en hmasa tlat si a. January ni 18, 2015 khan Lazio home-ah Napoli chuan Higuain goal hmangin si khat faiin Lazio an hneh a nih kha. May ni 31, 2015 hian Napoli an chak leh a nih chuan Champions League qualifying an khel thei dawn a ni.