Pathiannia San Marino Moto2 ah Romano Fenati chuan rider dang bike brake a va khawihsak a, Stefano Manzi chu dinhmun hlauhawm takah a dintir hman a, thil pawi zawk a thleng lo hlauh a. A team te chuan Fenati contract an titawp a, an team atangin an chhuahtir zui nghal.
Italian rider Fenati hi a hnampui tho Stefano Manzi nen an inum phei a, Fenati hian Manzi lehpelh tumin tan a la a. 140mph vela an tlan laiin Fenati chuan Manzi bike handlebar chu a va ban a, a brake chu hmeh a va tum a. Manzi hian balance a hloh lek lek a, mahse buaina lian tham a thleng lo a, Manzi pawh hian intlansiak chu a chhunzawm ve leh a ni.
Marinelli Rivacold Snipers rider Romano Fenati hi lap 23-naa a chet dan avang hian a disqualify mai bakah intlansiak dang vawi hnihah a tel thei dawn lo bawk a ni.
He thil thlen hma deuh hian Fenati leh Manzi te hian boruak an lo nei tawh a. Manzi hian Fenati lehpelh a tum a, hetah hian an intai a, an pahnih chuan track pawnah an tlan chhuah phah ve ve a. Intlansiak chu an zawm leh ve ve a, mahse eng emaw zatin an rawn lehpelh phah a ni.
Hetiang thil a thlen takah chuan Fenati chu a thinrim a, mawi lo takin a che zui ta niin a ngaih theih a. A hma pawhin Fenati hian chet mawi loh deuh mai a lo nei tawh a, BT Sport video an hai chhuahah Fenati hian rider dang bike chu a va tlawh a ni.
British MotoGP rider Cal Crutchlow chuan Fenati chu dam chhunga intlansiak thei tawh lo tura hrem tlak nia a ngaih thu a sawi a, thil pawi lian tak a thleng ta lo hlauh chu vanneihthlak a tih thu a sawi bawk.
San Marino-a pathumna Cal Crutchlow chuan, “Motorcycle intlansiakah hian tel tawh miah lo tur a ni a. Garage-a a luh chiah khan a team te pawhin an chhuahtir nghal hial lo kha a mak zawk a. Khatiang khan motorcycle racer dang lakah tih reng reng loh tur ania, khatiang tel lo pawh khan kan nunna kan thap sa reng tawh a ni,” a ti.
Vawi 4 ngawt MotoGP world champion ni tawh Marc Marquez pawhin Fenati chu tlan ve thei tawh lo tura hrem tlak nia a ngaih thu a sawi ve bawk a ni.
Season tharah hian Fenati hi Manzi team MV Agusta a lut tura beisei a ni a, mahse hetiang thil a thlen takah chuan Moto2 khawvel atanga a inthiarfihlim a ngai dawn ta a. Marinelli Snipers chuan an team atangin Fenati hi an ban a, team dang pawhin an lak theih tawh a rinawm loh a ni.
Marinelli Snipers Team chuan thuchhuah an siam a, “Tun atang hian rider Romano Fenati nen kan inzawmna kan titawp a, a chet mawi loh em avang leh midang tana hlauhawm taka a awm avangin contract kan neih pawh kan titawp nghal e,” tiin an tarlang.
An thuchhuahah chuan, “Tun atang chuan Fenati hi Marinelli Snipers Team tan khawiah mah a tel thei tawh dawn lo a. Mi nunna tana hlauhawm khawp thil a tih avangin pawi kan ti hle a, ngaihdam dil ringawt pawh hian a thawi dam dawn si lo a, a pawi tak zet a ni,” tiin an tarlang bawk a ni.