11 Jul 2019 12:39

bakteaJr.

Mizo tlangval

​Roma-in Alderweireld an hmu tai

Italian club AS Roma chuan Premier League club Tottenham Hotspur defender Toby Alderweireld chu an hmu tai hle a, lakluh an tum dawn niin Sky Italia chuan a tarlang.

Roma hian tun nipui chhungin an defender rinrawl Kostas Manolas chu Napoli lamah an chana, hemi a nih avang hian Roma hian centre-back pahnih tal lakluh an duh niin sawi a ni.

Tarlan danin Roma hian Atalanta defender Gianluca Mancini chu an dawr mek a, ani hi pound maktaduai 22 man vel a ni. Mancini bakah Roma chuan Alderweireld emaw Real Betis defender Marc Bartra chu an rim bawk dawn niin tarlan a ni.

Alderweireld hian a contract-ah release-clause a nei tel a, a release clause hi pound maktaduai 25 bak ni lovin, hei hi Roma chuan an pek hreh lutuk a rinawm loh.

Roma hian Napoli hnena pound maktaduai 32.3 a Manolas an hralh tawh bakah Porto hnenah an defender dang Ivan Marcano chu pound maktaduai 4.5 in an lo hralh tawh bawka, defence lamah an squad a pan rih viau.

Kum 30 mi Alderweireld hi naupang tawh lem lo mahse a tlem berah kum 3 chho chu la daih tura rin a ni a, tunah hian Premier League defender tha zingah telh a la ni reng nghe nghe.

Alderweireld hian Tottenham a chhuahsan hreh lo niin a langa, mahse a mah hi dawrtu mumal tak an la awm lo. Manchester United nen sawizawm ni leh zeuh thin mahse thu belhchian dawl a ni hran lova, Roma lamah a kal hi a rinawm ber rih a ni.