05 Oct 2018 11:35

inkhel

Roger Federer tluka tha an la awm lo: Rafael Nadal

Rafael Nadal chuan Roger Federer anga thiam a hmachhawn thei chu vannei a intih thu sawiin, Federer aia tennis player tha hi an la awm ngai loh thu a sawi.

World No. 1 Rafael Nadal chuan Swiss superstar Roger Federer chu player dangte nen khaikhin ralah chuan a chungnung filawr hle niin a sawi a, a hmachhawn apiangin engtin emaw tak a awm ziah thu a sawi a. “Roger nen kan inkhelh apiang hi chuan match ropui bik a ni zel mai a, keima tan chauh pawh ni loin, ama tan pawh match danglam bik leh hlu bik a ni ve ziah tho a ni,” a ti.

Nadal chuan, “Roger nen kan inkhelh tawh hi chuan player dang ka hmachhawn tuma ka rilru put hmang ang kha ka pu ngai lo a, a danglam hlak zel a. Midang nen kan intum aiin ka tang zual zawk ziah a, theihtawp tak meuh ka chhuah ngei ngei thin a. Roger ka hmachhawn apiang hian ka tana match pawimawh ber hi a ni thei zel mai a ni,” a ti bawk.

A sawi zelnaah, “Fans te chuan Roger nena kan inkar boruak hi an ngaihven thei hle a. Mahni inrinhlelhna hi kalsan thei zel ila, Roger ai hian beiseina nei sang zawk ziah ila kan inkhelh apiangin ka hneh thei mai dawn a ni,” a ti.

“Mi zawng zawng hian mahni inrinhlelhna hi chu kan nei vekin ka ring a, rinna tlakchham riau chang pawh kan nei fo hlawm a. Khatiang kha kan dam chhung chuan kan nei fo dawn chu a ni si a, kei pawhin ka nei ngun hle a. Hetih rual hian rinhlelhna te, inrintawk lohna te hi a hneh theih a, kan rilru kan tihpaukhauh tlat a pawimawh a ni,” tiin Nadal chuan a sawi.

Spanish star chuan, “Ka inkhelh hma zan te hian a tuka ka match khelh tur ka ngaihtuah thin a, ka inkhelh turah chuan ka chak ngei dawn a ni tiin ka rilru ka siam fel thin a. A nihna takah chuan hetianga ka tih apiang hian a thlen dik ngei hi ka ring ngam vek ngai lo hle a, mahse chak ka inrin loh nghal ringawt chuan chak loh kha ka hnaih viau dawn tihna a ni,” a ti a ni.