Roger Federer: 39

08th August 2020, 10:08PM

Mi tam takin khawvela tennis player ropui ber tia an sawi Roger Federer chuan vawiinah hian kum 39 a tling ve ta a, kum 20 chuang zet chu professional tennis a khel tawh a ni.

Swiss superstar Roger Federer hian 1998 ah khan professional tennis a khel tan a, tun thlengin a langsar pawl a la ni chho thei reng a. Tun dinhmun a thlen theihnaah hian hnuhma duhawm tak tak a hnutchhiah teuh tawh a ni.

Kum 39 a tlin lawmpuina ni pahfawmin a chanchin thenkhat, tlema danglam leh chhinchhiahtlak deuh han bih kual ila a tha awm e.

Roger Federer hi World No. 4 a ni mek a, tun thlengin Grand Slam final vawi 31 a khel tawh a, hengah hian title 20 a la tawh a, amah aia la hnem an la awm rih lo a. Grand Slam title a lak tawhte chu Wimbledon 8, Australian Open 6, US Open 5 leh French Open 1 te an ni.

Federer hian ATP singles title 103 zet a la tawh a, hengah hian ATP Masters 1000 title 28 a tel a, ATP Finals title 6 a la tawh bawk a, hei pawh hi amah aia la hnem an la awm lo a ni.

Tennis player zingah chuan Federer aia Wimbledon title la hnem hi an la awm lo a, men’s singles title vawi 8 a la tawh a. A hmaa Pete Sampras-a record, vawi 7 chak theih chu a khum tawh a. Mipa tennis player awm tawh zingah chuan Wimbledon final vawi 12 lut thei awm chhun a la ni.

1998 kumah khan Federer hi professional tennis huangah a zuang lut tan a, Wimbledon boy’s championship-ah a chak ber a ni thei a, US Open finals ah erawh a chak ta lo thung.

Grand Slam final lut hnem ber record chu a elpui ber Rafael Nadal nen an chelh dun mek a, Nadal hian French Open final vawi 12 a lut tawh a, Federer-a’n Wimbledon final vawi 12 a luh nen a intluk chiah a ni.

Mipa tennis player zingah chuan Grand Slam event pahniha vawi 6 champion tling thei awm chhun niin, Australian Open leh Wimbledon ah te vawi 6 a champion tling ve ve a. A zawnin hmun hnihah Grand Slam title vawi 5 (Wimbledon 2003-07 & US Open 2004-08) a la thei bawk a ni.

Roger Federer hian World No. 1 nihna chu kar 310 zet a chelh thei a, Open Era bikah chuan tluk theitu an awm lo a. Amah hnaih zualtute chu Pete Sampras (286), Novak Djokovic (282), Ivan Lendl (270) leh Jimmy Connors (268) te an ni.

World No. 1 nihna hi a zawnin kar 237 chhung chu Federer hian a chelh thei bawk a, hetah pawh hian a sang fal viau bawk a ni.

Open Era bikah grass court-a chak zawn rei thei ber niin, 2003 leh 2008 inkarah khan a zawnin vawi 65 a chak thei a. 2002 Wimbledon title a lak atanga tanin 2008 Wimbledon-a hneh loh a tawn khan a tawp chiah a ni.

Tennis court pawn lamah pawh chanchin danglam sawi tur a nei nual a, Federer hian tawng chi hrang hrang a thiam nual a, nal takin tawng chi 6 chu a thiam a. Switzerland leh South Africa citizenship a nei a ni.

2009 kumah khan tennis player tho Mirka Vavrinec nen an innei a, phir vawi hnih an nei tawh a ni.

An khua Basel-a university chuan Federer hi November 2017 ah khan an ram a tihhmingthat theih em avangin honorary doctorate degree an hlan a. December 2019 ah khan Switzerland rama pawisaah Federer-a hmel hi an tilang a, mihring dam lai hmel tihlan hmasak ber a ni.

Copyright © inkhel.com 2024. All rights reserved.