08 Aug 2019 09:40

inkhel

Roger Federer - 38

Roger Federer chuan vawiin (8.8.2019) hian kum 38 a tling ve ta a, a piancham lawmpuina ni pahfawmin a chanchin thenkhat langsar zual han tarlang ila.

September 22, 1997 ah khan kum 16-a upa Roger Federer chu a vawi khatna atan ATP singles ranking-ah a hming a lang ve tan a, Bossonnens-a Switzerland 1 Masters Satellites an khelhah point 12 hmuin No. 803 a ni.

Swiss star Federer hi kar 872 (a zawnin kar 733) chhung chu Top 10 huang chhungah a awm thei a, Open Era bikah phei chuan hetiang chen awm thei dang hi an awm lo a. Federer hi a zawnin kar 237 chhung chu No. 1 a ni thei bawk a. Top rank player ni thei upa ber niin, 2018 Rotterdam-ah khan kum 36-a upa a ni.

Federer hi August 5, 2019 thlengin Top 50 huanga player upa ber niin, Wimbledon champion ni thei upa ber a ni bawk a, 2017 Wimbledon title a lak khan kum 35 leh thla 11 a upa a ni.

World No. 1 ni thei 26 zinga pakhat niin, Top 10 player dangte vawi 200 chuang hneh thei pahnih zinga pakhat a ni a. Rafael Nadal (34) leh Novak Djokovic (33) te chauh chu Roger Federer (28) aia Masters 1000 title la hnem awm chhun an ni.

American tennis star Jimmy Connors tih lohah chuan Federer hi singles match-a vawi 1200 chak tling thei leh singles title 100 la tling thei hmasa leh ber a ni. Kar 733 chhung No. 1 a nihna hi Rafael Nadal chiahin a khum thei a, Nadal hi kar 745 chhung chu No. 1 hi a ni thei a ni.

Kum 38 a tlin champhaah khawvela chungnung ber a nihna 38 thur chhuak ang.

38 - Top 10 huanga awm laka chak hnem ber (221)

37 - Grass court-a chak hnem ber (187)

36 - Grass court title la hnem ber (19)

35 - Tournament final-ah vawi 24 a chak zawn (2003 Vienna atanga 2005 Basel)

34 - Kar 310 chhung World No. 1

33 - Kar 237 chhung khawvelah top rank player a ni thei

32 - World No. 1 ni thei upa ber (kum 36)

31 - Kar 850 chhung Top 10 huangah a awm tawh

30 - Masters 1000 final-a chak lo hnem ber (22)

29 - Tournament pakhata final lut hnem ber (14 - Basel)

28 - ATP Tour Finals title vawi 6 a la thei

27 - Tournament pakhatah vawi 100 chak thei (Wimbledon)

26 - Court pathumah title 10 a la tling vek (Hard court - 70, Grass - 19, Clay - 11)

25 - Australian Open bikah a zawnin set 30 a la (2006-08)

24 - Wimbledon bikah a zawnin set 34 a la (2005-06, 2017-18)

23 - Wimbledon-ah a zawnin match 40 chhung a chak (2003-08)

22 - US Open-ah a zawnin match 40 chhung a chak (2004-2009)

21 - Australian Open-a chak hnem ber (97)

20 - Wimbledon-a chak hnem ber (101)

19 - Grand Slam paliah final vawi 5 a lut tling vek (Australian Open - 7, French Open - 5, Wimbledon - 12, US Open - 7)

18 - Grand Slam pahnihah final vawi 7 a lut tling (US Open leh Australian Open)

17 - A zawnin vawi 10 chhung Grand Slam final a lut (2005 Wimbledon-2007 US Open)

16 - Grand Slam semi final a zawnin vawi 23 a lut (2004 Wimbledon-2010 Australian Open)

15 - A zawnin Grand Slam quarter final vawi 36 a lut (2004 Wimbledon-2013 French Open)

14 - Vawi thum chu kum khat chhungin Grand Slam 4-ah final a lut vek thei (2006, 2007, 2009)

13 - Grand Slam singles khel hnem ber (77)

12 - Grand Slam quarter final lut hnem ber (55)

11 - Grand Slam singles semi final lut ngun ber (45)

10 - Grand Slam singles final lut hnem ber (31)

9 - Grand Slam match 400 khel tling thei (2019 Wimbledon thlengin vawi 410)

8 - Grand Slam 4 ah vawi 70 chuang a chak thei vek (Australian Open - 97, French Open - 70, Wimbledon - 101, US Open - 85)

7 - Grand Slam singles match 350 ah a chak tling (2019 Wimbledon thlengin vawi 353)

6 - Hard court Grand Slam title 11 a la tawh (Australian Open - 6, US Open - 5)

5 - Kum khat chhungin Grand Slam title 3 hi vawi 3 a la tawh (2004, 2006, 2007)

4 - Grand Slam singles final-ah vawi 7 a chak tlin hmasak ber (2003 Wimbledon, 2004 Australian Open, 2004 Wimbledon, 2004 US Open, 2005 Wimbledon, 2005 US Open, 2006 Australian Open)

3 - Vawi hnih chhung a zawnin Grand Slam tournament-ah tum 5 a chak tawh (Wimbledon, US Open)

2 - Wimbledon singles title vawi 8 a la tawh

1 - Grand Slam singles title vawi 20 a la tawh