Liverpool manager Brendan Rodgers chuan dinhmun chiang lo taka awm mek an forward Raheem Sterling chhuak lo turin a duh a, an club-a kum hnih daih contract ala neih hmang zo se a tih thu a sawi.

Liverpool hian Zirtawpni khan Sterling titi pui an tum a, mahse a agent Aidy Ward-a'n thudang a neih tak avangin an thulh (cancel).

Ward hian, "Contract thar a ziak lo ang. Kar khata £700,000, £800,000, £900,000 hlawh tur pawhin a ziak lo ang. Ka hna chu an tana tha ber tur tih a ni. Miin dem emaw sawisel mahse awmzia a awm lo." tiin Evening Standard hnenah a sawi.

Kum 21 mi Sterling hian kum 2017 thleng daih Liverpool-ah hian contract ala nei a, May ni 10-a Chelsea an hnehloh hnu khan an manager hnenah chhuah a duh thu a hrilh tawh.

The Reds manager Rodgers chuan, "Raheem hian kum hnih daih contract ala nei a, hei hi a hman zawh ka beisei." tiin a sawi.

Rodgers hian Premier League-a an game hnuhnung ber tur Pathiannia an khelh hunah Sterling hi a khelhloh nachhan tur a awm lo tih a sawi bawk a, an club-a awmzui turin hlimloh chhan tur a awm lo tih a sawilang bawk.

Sawi chhunzawmin Rodgers chuan, "Boruak hi chinfel kan duh a mahse a laka ka rilru chu a danglam phah lo. Hetah hi chuan buaina a awm lo."

"Raheem hi a hlim lo lai pawh ka la hmu lo. A aiawh(agent)-in season tawp lama inbiak a duh thu a ti chiang tawh a kan game hnuhnung ber turah chiah rilru a awm." tiin a sawi.

English forward hian kar khata £100,000 hlawh tura an sawmna alo hnar tawh a, Zirtawpni a inbiak an tum an thulh takah hian Rodgers leh chief executive Ian Ayre hnenah nipui hian chhuah a duh thu a hrilh beisei a ni a mahse an tum angin thil a kal ta lo.

Merseyside club hian nikum nipui lai khan Luis Suarez an hralh tawh a, season liamta a che tha tak Daniel Sturridge a inhliam deuh reng a an striker-te'n beisei an pha lo bawk nen tun season-ah an che tha tawk lo.