NBA play-off khelh zelah Houston Rockets leh Utah Jazz te chuan 3-1 in hma an hruai ve ve a, Minnesota Timberwolves leh Oklahoma Thunder te chan a chau tan deuh a tih theih.

James Harden chu Houston tan a langsar fal hle a, third quarter-a an team point 50 zinga 22 chu a score a, Rockets hian Timberwolves chu 119-100 in an hneh a, first round play-off series-ah 3-1 in hma an hruai.

Chris Paul chuan point 25 a score a, Clint Capela chuan point 14 a score a, rebound 17 a la a. Eric Gordon pawhin point 18 a score bawk a. Timberwolves tan Karl-Anthony Towns chuan point 22 a score a, rebound 15 a la bawk a ni.

Donovan Mitchell chuan point 33 a thun a, Utah Jazz chu Oklahoma Thunder lakah a chakpui a, Jazz hian play-off series an khelh mekah 3-1 in hma an hruai.

Joe Ingles chuan point 20 a score a, Rudy Gobert pawhin point 16 a score a, rebound 10 a la bawk a. Ricky Rubio pawhin point 13 a thun bakah assist 8 a nei a ni.

Thunder tan Paul George chuan point 32 a score a, Russell Westbrook pawhin point 23 a score a, rebound 14 a la bawk a, Oklahoma chu an chakpui zo ta chuang lo a. He game-ah hian Thunder hian field shot hi 39% chauh an nei a ni.