Houston Rockets chuan champion lai Golden State Warriors chu an hneh a, Western Conference finals-ah 2-2 in an inhnehtawk theih phah.

Game 3 an khelhin Rockets hi point 41 zetin an chak lo a, Game 4 ah chuan hetiang thlentir leh hi an tum lo hle a. Fourth quarter-ah Rockets hi an che fuh hle a, hei vang hian Golden State court-ah ngei mai an chak theih phah a ni.

James Harden chuan he inkhelah hian point 30 a score a, Chris Paul pawhin point 27 chu a score bawk a, Rockets hi 95-92 in an chakpui hram a. An pahnih hian point 57 zet chu an team tan hian an thawh a ni.

Stephen Curry chuan point 28 a score a, Kevin Durant pawhin point 27 a thun bakah rebound 12 a la bawk a, mahse an team chu an chakpui zo ta chuang lo a. Warriors hian NBA record an chelh zui tho a, season tawp hnu inkhelah a zawnin vawi 16 an chak tho a, a zawna vawi 17 chak chu an tlin ta lo.

Game 5 chu Houston-ah an khel leh dawn a. Golden State hian tun tum hi playoff an khelh rei ber a ni dawn a, hemi hmaa playoff series an khelh pahnih chu game 5-ah an la hman ve ve a ni.