Nilaini khan Liverpool defender Andy Robertson chu hlawhtling taka zai a ni a, a dar hliam avang hian a chawlh chhung tur erawh Klopp chuan a sawi lawk thei lo.

Euro 2024 qualifier match-a Spain nen an inhmachhawn tumin Robertson hi Unai Simon nen an insu, hei vang hian a dar a ti pelh palh. 

Liverpool lamah inenkawl turin a haw nghal a, a hliam endik a nih hnuin zai a that zawk an ring, hei vang hian nilaini khan zai a ni ta a ni.

"Hlawhtling takin Robertson-a dar chu zai a ni a, duhthusam angin thil a kal e. A chawlh hun chhung tur hi kan hre bik lo a, hna pawimawh hmasa chu kan zo ta phawt e," tiin Liverpool boss Klopp chuan a sawi.

Robertson hian Liverpool tan tun season Premier League-ah game 8 a khel tawh a, goal khat a khung ve tawh bawk.

Robertson a inhliam takah chuan, Liverpool hian Greece left-back Kostas Tsimikas chu an chhawr chho tan ta a, kum 27 mi hi Europa League leh EFL Cup-ah pawh Reds tan a inlan tawh a ni.

Klopp hian tlarhnunga chhawr theih player a la nei nual tho a, Joe Gomez leh kum 19 mi Luke Chambers te chu mamawh hunah left back-a chhawr theih an nih thu a sawi bawk.