Tunlai left back-ah chuan Andy Robertson aia tha sawi tur an tam bik chuang lovang. Liverpool chakna thahrui a ni a, Liverpool attacking a puih nasat zia pawh kan hria. Hetih lai hian Manchester United defender hlui Rio Ferdinand chuan Robertson aiin Evra tha a tih zawk thu a sawichhuak.

Ferdinand leh Evra te hi Manchester United-ah kum 8 leh a chanve vel an inkawp a, Sir Alex Ferguson-a hnuaiah Premier League title 5 leh UCL title an la. David Moyes-a'n United a enkawl chhoh khan anni hian United-ah an hun tawp an hmang chho ta a ni.

Kum 2017 khan Robertson hian Hull City atangin £8million-in Liverpool a zawm a, Jurgen Klopp-a hnuaiah season liamta khan Champions League no mawi an chawi, tun season Premier League-ah fal taka an khelh chhoh laiin coronavirus darh avangin football khelh chhunzawm a theih ta lova, Premier League title dawng mai turin an awm mek kan ti thei awm e.

Football pundit Ferdinand chuan kum 26 mi Robertson chu fak hle mahse Evra erawh tha a tih zawk thu a sawi. "Evra ka thlang zawk, Robertson aiin Evra tha ka ti zawk a ni.

"Evra kha a rang zawk a, thahrui pawh a ngah zawk. Tin, box chhungah phei chuan Evra kha a tha zawk fe bawk, khingpuite chang turin an hnungah a lo awm hman zel bawk a.

"Robertson angin assist a nei tam lo, mahse goal erawh a khung hnem zawk tlat. Pakhat leh pakhat inbitumah phawh Evra a tha zawk a, hetih lai hian Robertson erawh mipui lakah a lar zawk tih chu tu pawhin kan hre vek ang," tiin Ferdinand chuan a sawi.

Evra hian kum 2006 atanga 2014 chhung khan United tan game 379 a khel a, Robertson erawh kum 26 mi chauh a la ni a, Liverpool tan a zinkawng a zawh chho mek, tunah hian Reds tan Robertson hian game 119 chauh a la khel tih hriat tel erawh a tha ang.