Robbie Keane-a'n football khelh a chawlhsan

28th November 2018, 10:11PM

Irish striker Robbie Keane chuan football khelh a tum tawh loh thu a puang a, inkhelh a chawlhsan takah chuan management lam a luhchilh zui nghal dawn a ni.

Kum 38-a upa Robbie Keane hian club hrang hrangah a khel kual hman nual a, Leeds United, Inter Milan, Tottenham Hotspur leh Liverpool te chu a langsar zualte an ni a. Ireland aiawhin vawi 146 a khel hman a, hengah hian goal 68 ngawt mai thunin an ram tana goal thun hnem ber a ni.

Robbie Keane chuan, “Kum 23 zet mai professional football ka khelh hnuah inkhelh bansan ka duh ve ta a, tun atang chuan ka inkhel tawh dawn lo a ni tih hi ka puang chiang e,” a ti.

“Crumlin United atanga bul tanin khawvel hmun hrang hrang ka hrut kual a, Milan, London leh Los Angeles velah te ka lo khawsa kual tawh hlawm a. A tirah kha chuan football avanga hetianga khawvel hmun hrang hrang ka tlawh kual theih hi ka beisei pha ngai lo a, Dublin khuaa seilian naupang ve mai tan chuan suangtuah phak bak thil a ni chiang hle a ni,” a ti bawk.

Keane hian kum 15 a nihin football lama eizawn dan tur ngaihtuahin England a pan a, street footballer ang vel niin tumruhna nen a bei tang tang a. Wolverhampton Wanderers chuan 1997 khan kum 17 mi a nih laiin an la a, Norwich City nen an inkhelh tumin an luhtir ve nghe nghe a. Professional football a khelh hmasak berah hian Wolverhampton chu 2-0 in an chak a, an goal hnih hi Keane-a thun ve ve a ni.

Hmasawn belh zel duhin Wolves atang hian a chhuak a, Coventry City, Inter Milan leh Leeds United te a zawm leh a. Chumi hnuah a vanglaia hun duhawm ber pawla a chhal chu Tottenham Hotspur ah a hmang zui a. Spurs tan hian game 238 vel zet a khel a, captain te a ni hman nghe nghe a ni.

White Hart Lane a chhuahsan a, Glasgow Celtic leh Liverpool ah te a khel leh zuai a, chumi hnuah West Ham United zawmin America ram lamah a kal leh a, Los Angeles khawpuiah LA Galaxy a zawm leh a. Aston Villa ah a khel a, hemi hnu hian India ramah kalin ATK ah a khel ve leh bawk.

Ireland tan 2002 FIFA World Cup bakah UEFA European Championship vawi hnih a khel hman a ni.

Copyright © inkhel.com 2024. All rights reserved.