18 Oct 2018 11:03

inkhel

​Ring chhungah Khabib nen kan inhnek ngei dawn- Mayweather

Boxing Champion hlui Floyd Mayweather-a chuan boxing ring chhungah UFC lightweight champion Khabib a inhnek pui tur thu a sawi a, MMA leh boxing fans nghahhlelh chu a thleng dawn ta niin a lang. He thu hi TMZ Sports-in Mayweather an kawmnaah a sawi nghe nghe a ni.

UFC 229 neih zawh khan Khabib-a chuan boxing champion hlui Mayweather hmachhawn a chak thu a lo sawi tawha, a duhthusam ram chu a takin a thleng dawn ta niin a lang. Khabib-a chuan, " Floyd, boxing-ah hnehloh i la nei lova, kei pawhin MMA fight-ah hnehloh ka la tawnglo bawk. Fighter tha ber pakhat chauh an awm thei a, kan sawi fel vat a ngai a ni, " a ti. Mayweather-a'n hnungtawlh a tum lo. Amah chotu hi twitter lamah chhangletin, " CBS, Showtime leh MGM Grand te khan cheque bu rawn la chhuak ru, "tiin twitter lamah Khabib hmachhawn ngei a duh thu a sawi.

Mayweather-a chuan TMZ Sports-in an kawmnaah Khabib nena an chungchang sawiin , " Khabib hian min hmachhawn a duh hle tih ka hria a, kan inhnek ngei dawn a, Octagon chhung ni lovin boxing ring-ah a ni thung dawn a, ka phur tawh hle a ni, " a ti bawk. Floyd-a chuan UFC 229 neih zawh taka Khabib chetdan chu mawl thlak a tih thu a sawi a, infiamni anih angin insumtheihna a tlachham deuh niin a sawi bawk.

Khabib-a chuan, " Floyd, Conor-a pawh nang chuan i hnek thlu thei lova, kei erawhin round 2 naah ka hnek thlu thung asin. Kan intum chuan nang pawh ka hnek thlu dawn che a ti bawk, ". Floyd-a chuan chhangletin, "Boxing ring chhungah kan hre mai dawn alawm, ka hnek i tuar zo lovang tih erawh ka hlau hle, " a ti thung.

Khabib leh Mayweather te hi inhnek se, fighter pahnihte hian sum tam tak an hailut ngei dawn a, Floyd-a tan phei chuan boxing lama tawnhriat neilo hmachhawn a ni dawn a, awlsam taka sum tam tak hailuhna tha tak a ni ngei ang. Floyd-a hian Las Vegas -ah inhnek ngei a duh laiin Khabib-a'n hmun danga inhnek turin a duh thung a, hemi anih chhan chu UFC 229 neih zawh taka a chetdan mawilo tak avangin a chungthu ngaihtuah mek a ni. Floyd erawhin Las Vegas-ah lo chuan a duh anga tam sum a hailut thei dawn lova, hmun danga inhnek loh hram a duh.

Fighter pahnihte hian fight record an nei tha dun hle a, Khabib-a hian mi 27 hmachhawn tawhin a la hneh veka, Floyd-a pawh hian mi 50 a tum tawhah hnehloh a la nei lo bawk. Mayweather bik hi nikum 2017 khan UFC lightweight Champion hlui Conor Mcgregor lakah technical knockout-in a lo chak tawha, Khabib nena an insual leh anih chuan Mcgregor a hneh hnu atanga MMA fighter a tum leh hmasak ber a ni dawn a ni.