​Rilru lam natna chhawk turin cocaine ka hmang- Fury

05th October 2016, 09:10PM

Tun hnaiah British boxer Tyson Fury-a'n chanchin tha lo a ngah hle a, Wladimir Klitschko nena an inhnek tur a thulh hnuah cocaine a lo hmang thin tih hmuhchhuah a ni. Kum 28-a upa Fury hi a title kawl lai an chhuhsak ngei rin a ni a, tun hnai khan boxing a chawlhsan thu Twitter kaltlangin puang mahse a fiamthu a nih thu a sawi leh hnuhnawh.

Fury hian rilru lam natna(depression) a neih avangin May thla atanga training a neih tawh loh thu sawiin, "May atang khan training mumal ka nei lo. Kartluanin zu ka in a, cocaine ka hmang bawk. Ka natna hi han enkawl vak dan ka hre lo a, ka ruih hian min chhawk ber a ni," tiin a natna enkawlna atana cocaine a hman thin thu a sawi.

Nikum November thla khan Klitschko hnehin WBA, IBF, WBO leh IBO title a kawl a, hei hi kum 2004 hnua Klitschko chak lohna hmasa ber a ni. kar hnih em pawh a ral hmain IBF title a kawl lai chhuhsak a ni a, Vyacheslav Glazkov nena inhnek tura tih nimahse Fury hian a hnek duh tlat loh vang a ni. Kumin July khan Klitschko nena inhnek tura tih an ni a, nimahsela inhliam avangin a inhnukdawk. November-ah sawn a ni a, hei pawh hi Fury bawkin a thulh leh a ni.

Copyright © inkhel.com 2024. All rights reserved.