West Ham manager David Moyes chuan an midfielder Declan Rice chu zawrh lai a nih loh thu a sawi a, an hralh dawn a nih pawhin a manah pound maktaduai 150 tal a ngaih tur thu a sawi.

Kum 23 mi Rice hi Premier League club lian ten an ngaihven mek a, Chelsea leh Manchester United te chu Rice ngaihventu langsar ber an ni a, West Ham atang hian an lei chhuak duh a nih chuan insen an inhuam ve viau a ngai dawn niin a lang.

Hammers boss Moyes chuan, “A hmasa berah chuan zawrh lai a ni lo tih hi ka sawi duh a, mahse lei duh an awm a nih chuan a tlem berah pound maktaduai 150 a ngai dawn a, nikuma pound maktaduai 100 man a ni kha a tlawm hle. Mahse zawrh lai a ni lo,” tiin Rice-a chungchang zawhna a chhang.

Nikum khan Manchester City chuan Tottenham atangin Harry Kane lei chhuah an tum hle a, Tottenham hian City in Kane an dawrna vawi li ngawt an hnar a, Rice-a chungchangah pawh Tottenham tihdan ang deuha tih ve an tum thu Moyes hian a sawi bawk.

“Harry Kane-a chungchangah Tottenham tihdan kan hmu a, keini pawhin khatiang deuh khan kan ti ve ang. An phal lova, man a nei a, a man zata dawrtu an awm chuan keini pawhin kan hralh mahna. Mahse a man zata min dawr loh chuan khawiah mah a kal dawn lo. Tottenham pawh khan chutiang chuan an ti a, Kane an chelh ta reng a ni.

“A tam zawkah chuan football club zawk hi player te chunga thuneitu an ni a, a chhan chu contract an nei. Player ten thu an neih zawk chang awm thin mah se, Tottenham-a Harry Kane-a’n contract a neia, a chunga thuneihna an nei ang chiah khan Declan hian kan hnenah kum thum leh a chanve daih contract a nei a ni,” tiin Scottish manager Moyes chuan a sawi belh bawk.