West Ham manager Manuel Pellegrini chuan Hammers midfielder Declan Rice chu fakin, English holding midfielder tha ber a nih thu a sawi bakah England tana a khel turin a inpeih tawh thu a sawi tel bawk.

Rice hi English mi niin London-a piang ni mahse a pi leh pute chu Ireland rama awm an nih avangin Ireland tan a khel theia, a international youth career zawng zawng pawh Republic of Ireland tan a hmanga, Ireland senior team tan pawh vawi thum a inlan tawh nghe nghe.

Ireland tan khel tawh mahse kum 20 mi Rice hian tunah hian England tana khelh a dil leh mek a, FIFA lam hian phalna a pek ngei pawh a rinawm. Pellegrini chuan, “Declan Rice hi England tana inkhel turin a inpeih tawhin ka hria,” tiin chanchinbu mite a hrilh.

Sawi zelin Manchester City boss hlui chuan, “Player a nihna angin hma a sawn theih nan kan chher zela, tunah hi chuan team danga holding midfielder-te aiin a khel tha zawk a ni. English player ho ka sawina a ni bera, foreign player Fernandinho-te ang pawh hi team lian-ah tha tak tak an awm. Tunah hi chuan Declan hi nakin atan kan chher mek a ni,” a ti bawk.

Pellegrini chuan River Plate lama a lo enkawl tawh thin; khawvela holding midfielder tha ber zinga chhal ngam Javier Mascherano leh Rice chu tehkhin bawkin, Pellegrini chuan, “Player naupang tam tak ka lo enkawl thawh thin a, Javier Mascherano kha ka enkawl hmasak pawl niin kum 17 mi chauh a ni.

“Mascherano-a rilru put hmang kha tuna Declan nen hian a inang em em a, kum 17 emaw kum 18 vel an nih lai khan kum 35 mi rilru an pu emaw tih mai tur a ni,” a ti.

Rice hi Chelsea academy chhuak a ni a, kum 2006 khan kum sarih mi lek niin Chelsea academy-ah a lut. Kum 2014 khan Chelsea chuan chhuah zalenin, kum 14 mi niin West Ham academy a zawm. A tirah Rice hi centre-back ni mahse defensive midfield-ah a khel chho a, tunah chuan defensive midfieder a ni mah tawh zawk a ni.