29 Jan 2019 11:10

inkhel

​RFL Plastics MFA Futsal League khuhhawnna neih a ni

RFL Plastics Mizoram Football Association (MFA) Futsal League khuhhawnna chu January 29, Thawhlehni zan kha. Chanmari YMA Hall-ah neih a ni a, MFA hruaitu te bakah sawmbik te an kal tha hle.

Khuallian Pu Lalrintluanga Sailo, Dy, Govt, Chief Whip chuan Kick Off hun neiin Futsal hi hunrei tak atangin ramdang chuan an lo khelh tawh thu te dan leh dun pawh felfai tak a duan anih dan te a sawi a, MFA-in thalai futsal lama tui te hmakhua ngai tak a league an buatsaih hi tha a tih zia a sawi a, league khel tur player zawng zawng te duhsakna a hlan.

MFA Futsal League hi January ni 31, Ninganiah Electric Veng YMA Indoor Stadium-ah khelh a ni ang a, team 16 ten inelna an hmachhawn ang. Team te hi Group A-B-ah then an ni a Group A-ah Zothan Futsal, Chanmari, Armed South FC, Laipui FC Laipuitlang, Ramhlun South FC, Lawmna FC Dinthar, Bawngkawn FC, Saron Veng FC, FC Ramhlun Venglai an awm. Group B-ah Chhinga Veng FC, FC Bungkawn, Durtlang FC, Zonuam FC, Electric Veng FC, Whetstone Ramthar, IDBI FC Tuikual North, FC Leitan an awm.

Khuhhawnna hun hi Nl Marilyn Khawlhring chuan thiam takin a hruai a, Nl Zau-i leh Kimkima hnen atangin zai mawitak ngaihthlak a ni bawk. Pu Lalnghinglova Hmar Honorary Secretary MFA chuan thusawiin futsal league-ah hian Nivia futsal ball hman a nih tur thu leh AIFF futsal legue khel hmabak ala awm thu sawiin futsal league khel tur team zawng zawng te duhsakna a hlan.

Santosh trophy 2019 hak tur Mizoram Football Team Jersey tlangzarh a nih hnuah club tin model ten an Jersey phochhuahna hun an rawn nei zui nghal bawk. Tv Lalbiakdika Ngente, Asst Secretary, MFA Futsal Commitee chuan team tin Captain theuh te ko chhuakin rinawmna thutiam a neih pui a, Pu Lalrinfela, Secretary MFA Futsal Committee chuan team intum dan tur leh group an awmna tur pawh tirna hun a hmanpui zui bawk.

Division One leh Veteran Open pawh khelh nghal a ni ang a, Division-I hi February ni1, 2019-ah khelh țan tur a ni a, Veteran hi February thla chawhnu lamah an khelh țan ve bawk ang.Veteran hi kum 40 chung lam a duh apiang tán khelh theih a ni ang a, 1979 leh a hma lama piang tán khelh theih a ni ang.

(adsbygoogle = window.adsbygoogle || []).push({});