“Hockey ka khelh chhan chu ka len hunah officer nih ve ka duh a,” tiin pawl 6 zirlai hmeichhe naupang Holika Tirki chuan a sawi.
Jharkhand state chhunga Hulhundu khuaa cheng Holika Tirki chu pawl 6 zirlai a ni mek a, an awmna bul hnaia mual zawlah chuan hockey a khel thin a. An khelmual diak tak maiah chuan a kuta hockey stick hum chungin a tlan kual zak zak a, a chal chu thlanin a bual huh ve zaih bawk a.
Chu khelmualah chuan Holika ang bawk hmeichhe dangte nen hockey an khel a, hockey khel hmeichheho zawng zawng deuh thaw chuan inanna pakhat an nei hlawm a. Chhungkaw khawsak harsa tak atanga chawr chhuak an ni deuh vek a ni.
Holika Tirki pa chu ni tin inhlawh thin niin, ni khatah hian Rs. 350 vel bawr a hlawh thin a. Holika hockey khelhpui tam zawk chhungte pawh chutiang deuh tho chu an ni hlawm a, thenkhat chu an inhlawhfa a, a then chu loah te an inhlawh ve bawk a ni.
Inkhel zinga a fanu rawn lamtu Rajesh Turkey chuan an fate hoin hockey an khelh chhan chu a sawi chiang a, tun atanga theihtawp chhuaha an khelh chhoh chuan nakin zelah an tan hamthatna a awm theih an beisei thu a sawi chhuak a.
“Kan fate hian tun atangin hockey hi tih tak zetin an khel chho zel ang a, theihtawp chhuaha an khelh zel chuan nakinah chuan inkhelh thiam vang hian hna te pawh an hmuh theih phah ve thei a. Sorkar hna hmu thei tur pawhin sports quota te a awm ve thei thin a, chutiang zara hna an hmu thei hlauh te a nih chuan anmahni an inchawm ve thei dawn a ni,” tiin Rajesh Turkey chuan a sawi.
Hulhundu khuaa chengte hi rethei tak tak an tam hle a, an sum lak luh a tam lo hlawm a, ei tur tha pawh nei mumal lo hi tam tak an awm hlawm a. Chutiang karah chuan hmeichhe naupang tam tak chuan an hun awlah hockey an khel thin a, nakin zela hna hmuh theihna a nih beiseiin theihtawp an chhuah thin a ni.
Rajest Turkey sawi ang deuh khan tun atanga tih tak zeta an inkhelh zel a, nakinah hna hmuh theihna atana an hmang thei a nih chuan anmahni mai bakah an chhungkaw tan hahdamna thlen theitu a ni ve thei dawn a ni.
Eng vanga hockey kher khel nge an nih tih an zawhnaah, inkhel ve thin Ankita Lakra chuan, “Helai hmunah hian game dang an khel ngai lo a, hockey hi a ni deuh ngar ngar mai a. Duh thlan tur dang a awm lem lo bawk a, kei pawhin hockey hi ka khel ve ta mai a ni,” a ti.
Hockey coach Dulari chuan hmeichhe naupang hockey khel thinte chu a kaihruai thin a, hetianga inkhel thinte hi sorkar chuan an bungrua turte a ngaihtuahsak thin nia sawiin, boarding centre te pawh an siam ve a ni tih a sawi.
Dulari chuan, “Sorkar atangin scholarship hi thla tin Rs. 500 hmu thin tur an ni a, chutih laiin thla 4 atanga thla 6 hnu velah chauh te an dawng ve thin a. A chang phei chuan kum khat hnuah te an dawng chauh thin a, a buaithlak khawp mai,” a ti.
Chhungkaw harsa tak tak atanga inkhel tura chhuak thinte hian a tlangpuiin ei tur mumal neih loh chang an ngah hle a. Dulari chuan hetiang lama an harsatna su kiang tur hian sorkar chuan engmah an tihsak loh thu a sawi a ni.
2020 Tokyo Olympic khel tura tling India hmeichhe team-ah khan Jharkhand atang hian Nikki Pradhan leh Salima Tete te chu an tling a, hetiang dinhmunah hian ding thei mah se an state huam chhunga hockey khelhna dinhmun chu a tha lo hle a. Dulari chuan an state sorkarin he infiamna hi an ngaihsak lo hle niin a sawi a ni.