​Reporter a fawh luih avangin boxer Kubrat hrem a ni

30th March 2019, 02:03PM

Bulgarian heavyweight boxer Kubrat Pulev chuan interview laiin amah kawmtu tu hmeichhe reporter chu a fawh ringawt avangin hrem a ni.

California-a boxing lama thuneitu California State Athletic Commission (CSAC) chuan Pulev-a license hi an chhuhsak rih a, inhnek thei lo turin an hrek rih dawn. Pulev hian reporter hi a fawh mai bakah a hnuah a mawng a tham sak leh niin a lang bawk.

Pulev hian California-a Romanian boxer Bogdan Dinu a hneh tumin an inhnek zawhah Pulev hi Vegas Sports Daily reporter Jennifer Ravalo chuan a kawm a, Ravalo hian Pulev hi Tyson Fury-a chungchang a sawipui laiin Pulev hian chiang takin camera hmaa a fawp ta mai a, Ravalo hi a hamhaih hle nghe nghe.

Pulev chuan Ravalo nen hian thian tha an nih thu a sawi a, mahse Ravalo erawhin he thil a thlen hma ni a inhre chauh an nih thu a sawi ve thung.

Pulev-a’n a fawh nu Ravalo, Jenny SuShe tih a hriat lar bawk chuan he thil thleng chungchang hi sawiin, “Kan inkawm laklawh laiin ka hmai a rawn dawm a, mi fawp ta ringawt; ka hamhaih nghal em em a, ka zak a, awm dan tur pawh kha ka hre lo.

“Min fawh hnu khan ka ipte vel kan dahna dawhkanah ka kal a, ka intih fel laklawh laiin a rawn kal leh a, a kut pahnihin ka mawng a rawn tham leh vak bawka, engmah sawi zui lovin nui uar uar chungina kal leh nghal.

“Hetianga mawi lo taka Kubrat Pulev-a ka chungah a khawsa hi ka lung a awi lova, ka awm pawh a nuam lo. Khatianga ka laka che tur kha Pulev kha engtin mah keima lam atanga thil tih ka nei lo a ni. Media mi leh sa ka nih avangin kha boxing match kha chhim ve mai ka ni a, hmeichhia an duh thu ni lova an hmuia fawh leh an mawng tham hi ngaihthah theih a niin ka hrelo. Hmeichhia a tu a pawh hi khatianga tih tur an nilo a ni,” a ti.

Copyright © inkhel.com 2024. All rights reserved.