Youth Olympics-ah India U-18 hockey team te chuan Austria chu 4-2 in an hneh a, he inkhelah hian India vice-captain Lalremsiami chuan goal 2 a thun a ni.

India chuan Buenos Aires, Argentina-ah bul an tan tha hle a. An match hmasa berah hian Lalremsiami goal hnih thun bakah skipper Salima Tete leh Mumtaz Khan te chuan goal khat ve ve an thun bawk a. Austria tan Sabrina Hruby leh Laura Kern te chuan goal khat ve ve an thun a ni.

Inkhelh tan atangin India chu an chungnung nghal hle a, goal thun tumin an nawr na viau a. Tan atanga minute 4 chauh a kal hman tihin vice-captain Lalremsiami chuan goal a thun nghal a, India chuan hma an hruai nghal der mai a.

Goal luh hnu lawkah India captain Salima chu a rawn che ve nghal vat a, minute 5-ah goal rawn thun ve nghalin India chuan 2-0 in hma an hruai zui a.

Austria chuan theihtawp chhuahin an nawr let ve leh a, minute 13-ah Sabrina Hruby chuan goal thunin, an si phurh pakhat chu a rawn sut a.

Mahse, India chuan a chungnung zawk an nihna an lantir chhunzawm zel a, Austria lamin goal an thun ve atanga minute 3 chauh a kal leh hman tihin minute 16-ah Mumtaz Khan chuan India goal thumna a thun ve leh a.

An khel tan leh chiah a, India goal hmahruai thuntu Lalremsiami bawkin minute 17-ah goal a thun belh leh a, India hmahruaina chu 4-1 ngawt a ni ta a.

Laura Kern chuan minute 20-ah goal a thun ve leh a, Austria si phurh pakhat chu sut ve leh mahse hun tawpah India hi 4-2 in an chak ta a. India hian Uruguay an hmachhawn leh dawn a ni.