Mizoram atangin a vawi khat nan Aizawl FC chuan India rama league sang ber I-League an khel dawn. January ni 9, 2015 (Inrinni) hian an match hmasa berah Mohun Bagan an tlawh dawn a, January ni 6, 2015 hian Aizawl FC chuan Kolkata an pan dawn a ni.
January ni 5, 2015 khan Aizawl Press Club-ah Aizawl FC hian press conference an nei a, Mizoram Governor pawhin lawmpuiin, thingpui a inpui nghe nghe a ni. Press conference-ah Aizawl FC president Pu Robert Romawia Royte chuan relegate tih lam chu an rilruah a lan loh thu leh sang taka invawrh an tum thu a sawi a ni.
Aizawl FC hian a vawi khat nan I-League an khel dawn a, club lian tak tak leh tawn hriat nei hnem tak tak an nih hlawm avangin he huangchhunga khawsak chu a tirah chuan a harsa maithei, heti chung hian Aizawl FC president chuan,"Kan debut season ni mahse relegation hi kan chan turah kan ngai lo. Tin, kan coach Manuel-a pawhin kan naute a ringtawk hle bawk a ni," tiin a sawi a ni.
Aizawl FC hian Youth Development lamah nasa takin tan an la a, AFC Under 18 leh Under 15 team tha tak Academy kaltlanga din a ni tawh bawk a, he Academy hi India rama corporate lian Tata Trust nen an thawkho bawk a ni. Aizawl FC president chuan Mizoram sorkarin engkima an hma an lakpuina avangin lawmthu a sawi a. Mizoram Football Association nen thawhhona tha tak an neih avangin lawmthu a sawi bawk. Tin, Mizoram mipuite leh Aizawl FC-te thawhhona a that dawn avangin a lawm em em bawk a, an debut season-ah hian tha taka tih an tum tur thu a sawi a ni. Hemi hnu hian Pu Robert Romawia Royte chuan I-League khel tura Aizawl FC an inpeih thu media-te hnenah a puangchhuak nghal bawk a ni.