07 Jan 2020 11:01

bakteaJr.

Mizo tlangval

​Red Bull-ah Verstappen a nghet

Dutch driver Max Verstappen chuan Red Bull tana a contract neih lai chu pawtseiin, Red Bull-ah hian kum 2023 season tawp thleng daih contract thar a ziak.

Kum 22 F1 driver Verstappen hi 2016 season atang khan Red Bull-ah a awm tawha, tunah pawh a la awm chhunzawm zel dawna, a lo berah Red Bull tan kum 2023 kum tawp thleng a tlan dawn niin a lang.

Contract thar a ziah chungchang sawiin Verstappen chuan, “Red Bull hian ka chungah rinna an nghat ngama, Formula 1-ah bul tanna hun tha min pe a, hemi avang hian ka lawm fo reng. Red Bull nena chak hi ka duh a, World Championship lak ho hi kan thil tum ber a ni,” a ti.

Kum 2016 khan Verstappen hian Spanish Grand Prix a la a, hetih hunlai hian kum 18 mi chauh niin F1 chanchina Grand Prix la thei naupang ber a ni nghe nghe.

Season liamta khan Verstappen hi pathumna a ni a, Mercedes driver pahnih Lewis Hamilton leh Valtteri Bottas –te chiah a pha lo.

Verstappen hi a la naupang a, driver beiseiawm ber zinga mi a ni bawk nen Mercedes leh Ferrari nen sawi zawm a ni reng thina, tunah erawh heng thuthang tam tak te hi a tawp dawn niin a lang ta a ni.