Nilaini zan khan Bundesliga match-ah Bayern Munich chuan VfL Wolfsburg an tlawh a, mikhual team-in 2-1 in hnehna an chang a, Munich tan Musiala leh Harry Kane ten goal an khung.

Bundesliga hian thlasik chawlh an nei leh dawn a, khelh 15 atangin point 38 an nei a, hmahruaitu leh anni aia game khata khel tam Bayer Leverkusen chu point 4-in an phak lo mek.

Minute 33-ah Bayern Munich-a contract ziak thar Muller-a cross chu Musiala chuan a tauh goal a, minute 43-ah Muller-a ball pek bawk chu Kane chuan pen 25 vel atangin mawi takin a chhuih goal.

Mual neitu lam tan first half tawp dawnah Arnold chuan goal khat a khung ve a, second half tawp dawn tak takah Maximilian Arnold chuan goal khungna hun tha tak nei mah se Manuel Neuer chuan a lo dan sak.

Kum 30 mi Harry Kane chuan, "Winter break kan nei dawn a, chawlh dan tha takin ka chawl thei dawn. Bayern Munich-a ka hun hman te a tha ka ti thlawt e, chawl turin ka inbuatsaih a, kum thar lamah kan lo kir leh ang," tiin social media-ah a tarlang.

Bayern Munich boss Thomas Tuchel chuan, "Goal a khung dan leh second half-a a khelh dan kha in lo en chuan, kan defender tha ber pakhat a ni. Ball a chelh a, ball kan hlohin a rawn um let bawk a, a chet dan kha duhthusam a ni," tiin a sawi.

Robert Lewandowski khan Bundesliga goal 41 a khung kum khan, a game hmasa 15-ah goal 20 a khung a nih kha. Harry Kane chuan Bundesliga game 15-ah goal 21 a khung tling ta a, game 15 atanga goal khung hnem thei ber record thar a siam.

Tun nipui bazar inhawn lai khan Spurs atangin Kane hian Bayern Munich a pan a, a season khatnaah game 15 atangin Bundesliga goal 26-ah a inrawlh a ni.