Record thar 15 siamtu Jeremy Lalrinnunga

22nd April 2019, 02:04AM

Youth Olympics gold medallist Jeremy Lalrinnunga chu Asian Weightlifting Championship-ah a che tha hle a. Ningbo, China-ah Mizo rawlthar hian record a siam nual a, Youth World Record leh Asian Record te a siam a ni.

Jeremy Lalrinnunga hi a hmaa a weight awmna thin chung chung lehah a tel a, tuna a telna hi senior competition a ni bawk a. Heti chung hian khawvel huapah pawh a duai lo a ni tih a lantir chiang hle a, he inelnaah hian a vaiin record 15 ngawt a siam thei a ni.

Kum 16-a upa Jeremy hi Inrinni zan khan Group B 67kg men’s event-ah a tel a, snatch-ah kg 134 a chawi a, clean and jerk-ah kg 163 a chawi bawk a, a pahniha a chawi zat belh khawm hi kg 297 niin Youth World Record leh Asian Record thar a siam a. Kazakhstan rit chawi chak Saikhan Taisuyev record lo siam tawh chu Jeremy hian a khum a ni.

Tun tuma Asian Weightlifting Championship an neih mekah hian Jeremy chuan international record 6 (Youth World Record 3, Youth Asian Record 3) leh Indian national record 9 ngawt mai a siam a, a record siam thar hi a vaiin 15 ngawt a ni.

Asian Weightlifting Championship hi Jeremy tel tawhnaah chuan a chet that berna a la ni a, a hmaa a chet that ber chu kumin February thla khan niin, Thailand rama EGAT Cup-ah a tel a. Hemi tum hian kg 131 a chawi a, hetah pawh hian Youth World Record chu a lo siam tawh bawk a, heta a chawi zawng zawng hi kg 288 a ni a, tun tumah ama record lo siam tawh chu a khum leh a ni.

Nikuma international federation lamin kg 67 category an telh thar hnua ram hrang hrang inelnaa he category-a Jeremy hi a tel vawi hnihna chauh a la ni a. He category hi Olympic Games leh inelna dangah an hman tanna hi a la rei vak lo hle.

Asian Championship hi Olympic qualifying event lian ber tiin a sawi theih a, he inelnaa an point te chu an khawl ang a, Tokyo 2020 Olympic atana final ranking an siam hunah an point dah khawl hi an chhiar tel dawn a ni.

Nikum October thla khan Jeremy hian Buenos Aires Youth Olympics-ah 62kg category-ah kg 274 (124+150) a chawi a, gold medal a lo la tawh bawk a. Point a khawl that chhoh em avangin 2020 Tokyo Olympic-ah chuan a tel theih ngei a rinawm tawh hle.

Copyright © inkhel.com 2024. All rights reserved.