Khawvela club ropui ber chu Real Madrid a ni ti ila kan sawi sual tam lo ang. Club level inelna sang European Cup/Champions League-ah vawi 15 lai an champion tawh.

Club ropui an nih chhan hi an inrelbawlna a that vang a ni a, player lak kawngah an mit it zawng an hlah lo a, lak sual palh thenkhat chu nei ve bawk mah se, Barcelona ang em ema sum khawhral ang chi kha an nei ve lo.

History ropui tak an neih avangin player te pawhin Real Madrid tana khelh an chak, hei tak hi anni tan pawh an duh zawng lak a awlsam phah bawk.

An player kawl lai te pawh, an kum la upa em em lo mah se, chhuah an duh chuan awlsam takin an chhuahtir mai zel a. Cristiano Ronaldo an chhuahtir te khan khawvel mak tih a hlawh a nih kha.

Champions League no mawi a zawna vawi thum an chawi hnuah Casemiro pawh an chhuahtir mai, Casemiro chhuak te kha a mak a nia, mahse a hun takah an chhuahtir tih tun hnu hian kan hre zel.

Player senior leh player naupang te nen balance tha takin team an din thin a, player naupang te tan pawh thanlenna hmun tha tak a ni zel bawk. 

Tunah hian player naupang tak tak an kawl mek, Kylian Mbappe an han la bawk ang a, kum 5 chuang chu team khawng tak an nei thei dawn tlat mai.

Eden Hazard an han la te kha chu an tisual ve alawm. Mahse Neymar an hralhna Barcelona-in an hman dan nen khaikhin chuan Real Madrid club inrelbawlna a that fe zawk zia kan hre thiam awm e.

An duh zawng player an la a, an mamawh tawh loh nia an ngaih te chu an thehchhuak vawng vawng zel bawk a. Club an dah ropui a, player aiin club an dah hmasa zawk zel hi an ropuina a ni kan ti thei awm e.